TIRANE-Në letër, është kjo finalja e parakohshme. Inter e Barcelona përballen sot në mbrëmje në "San Siro" në një gjysmëfinalen e Ligës së Kampioneve. Në fushë do të zbresin shumë kampionë, por edhe shumë "ish"-ë, ndërsa skuadrat kanë një stil ndryshe të të luajturit futboll. "Por, e nisim si të barabartë", u shpreh në konferencën e djeshme për shtyp tekniku i Interit Zhoze Murinjo. Një deklaratë e guximshme, po të kihet parasysh se Barcelona dominon thuajse çdo skuadër që ka përballë dhe për më tepër, ka në gjirin e saj futbollistë të jashtëzakonshëm kur kanë topin në këmbë. "Nuk më intereson mbajtja e topit, - shton portugezi. - Nëse nesër (sot) fiton skuadra që e mban më shumë topin, atëherë kemi humbur që tani. Në ndeshjet e grupit Barcelona tregoi superioritet ndaj nesh, duke fituar qetësisht dhe me meritë, por tashmë ka kaluar shumë kohë. Ata janë të fortë si në nëntor, por ne jemi më mirë se ç'ishim. Për këtë arsye mendoj se është një ndeshje 50 me 50. E di që do të jetë e vështirë, por dyshoj që ata nuk janë të shqetësuar që përballen me ne", deklaron më tej Zhoze Murinjo. Portugezi ka sqaruar në dy javët e fundit ka parë shumë ndeshje të Barcelonës, por ende nuk ka një formulë të qartë për të ndalur Mesin. "Leo mund të luajë në të djathtë, në të majtë, si pykë pas Ibrës apo pas Bojan Kërkiç, siç luajti ndaj Arsenalit në Kamp Nou. Është një lojtar i rëndësishëm që meriton një vëmendje të madhe, por për kulturën time nuk është e mundur një mbulim tek për tek".
Barça me autobus
Barcelona ka mbërritur dje pasdite në Milano, pas gati 12 orësh udhëtim me autobus dhe një ndalese në qytetin francez të Kanës. Një ditë intensive për katalanasit, që kanë zhvilluar 1 mijë kilometra për të arritur në Veri të Italisë, për ndeshjen e sotme. Në orën 19.00 është zhvilluar edhe seanca e fundit stërvitore në "San Siro", ndërkohë që trajneri Pep Guardiola ka dhënë konferencën e zakonshme për shtyp para fillimit të saj. "Luajmë kundër Interit, një skuadër që ka fituar 4-5 titujt e fundit në Serinë A italiane, kështu që kemi një respekt maksimal për kundërshtarin, - u shpreh trajneri i Barçës, i cili u është përgjigjur në spanjisht gazetarëve spanjollë dhe në italisht atyre italianë. - Shkëmbimi Eto-Ibra? Të dy klubet mendoj se kanë bërë një shkëmbim të kënaqshëm", shtoi Pep. I pyetur për udhëtimin e lodhshëm të rivalëve, Murinjo nuk beson se ky do të përbëjë avantazh për Interin. "Nëse do të më kishte ndodhur mua, do ta kisha shfrytëzuar udhëtimin për të "çimentuar" grupin, - tha ai. - Udhëtimi me autobus është padyshim jo komod, por Bergkamp e Mariga do të pëlqenin më mirë të udhëtonin me autobus, sesa me avion. Edhe ne shkuam në Moskë kundër një skuadre që nuk luante prej një jave, gjetëm një fushë plastike dhe luajtëm".
