Lajme ekonomike Shqipetare

[Aulona]

Zhvlerësimi i lekut, pritet rritje e kostos së jetesës

Zhvlerësimi i lekut, pritet të shkaktojë një reaksion zinxhir pasojash në ekonominë e vendit. Pritet të rriten cmimet e mallrave të konsumit, por rritje do të pësojnë edhe interesat e kredive në valutë. Version multimedial i ketij lajmi

TIRANE- Rënia e ndjeshme e monedhës kombëtare lekut gjatë javëve të fundit, pritettë shoqërohet me një valë të re të rritjes së cmimeve. E thënë ndryshe, të gjithë ne do ti blemë më shtrenjtë mallrat e konsumit të përditshëm, si ushqimet, veshjet, qeranë, shërbimet mjekësore e arsimore etj. Sipas kursit të këmbimit të Bankës së Shqipërisë euro ka arritur nivelin e 132.5 lekëve, duke shënuar një rritje të ndjeshme kundrejt disa muajve më parë. Nëncmimi i monedhës vendase do të shkaktojë një reaksion zinxhir efektesh në ekonominë tonë. Kjo pasi pritet rritje e cmimeve të mallrave të importit dhe rrjedhimisht rritje e cmimeve në tregun e shitjeve me pakicë. Nga ana tjetër , qytetarët do të blenë më pak produkte dhe shërbime me pagat e tyre, pasi vlera e lekut shqiptar është në rënie të vazhdueshme. Pasoja do të kenë edhe të gjithë klientët e bankave që kanë marrë kredi në valutë dhe që të ardhurat i kanë në lekë.

Ata do të paguajnë më shumë për këstet mujore pasi interesave do tu shtohet edhe kostoja e transaksionit. Përfituesit e vetëm të oshilacioneve të kursit të këmbimit janë eksportuesit, fitimet e të cilëve do të rriten.

Ekspertët e ekonomisë parashikojnë një nëncmim të mëtejshëm të lekut gjatë muajve të ardhshëm, cka përbën një lajm të keq për të gjithë ne, pasi kjo situatë përkthehet në rritje të kostos së jetesës dhe në thellim të nivelit të varfërisë.
(e.n/News24/BalkanWeb)

[Sally]

Institucionet mikrofinanciare, “barkë” shpëtimi për kreditimin rural

Ndërsa bankat e nivelit të dytë kanë ulur nivelin e kreditimit në muajt e fundit, e kundërta ka ndodhur me institucionet e kursim-kreditit. Ato kanë vazhduar të mbështesin me kredi, por edhe me shërbime të reja anëtarët e tyre, madje dhe ata të regjistruar rishtas rreth këtij grupimi. Në raportin e fundit të Unionit të Kursim-Kreditit të dhënat flasin për vazhdimësi të kreditimit dhe rritje të anëtarëve të këtij grupimi. Sipas raportit të fundit, periudha e 6-mujorit të parë të këtij viti ka nxjerrë në pah rritjen e aktivitetit financiar të Grupit Union–SHKK, si pjesë e rëndësishme e mikrofinancës në vend. Nga të dhënat e këtij harku kohor rezulton se ai zotëron një total asetesh prej 5 miliardë lekësh, portofol kredie rreth 3.6 miliardë lekë, depozita në shumën mbi 1 miliard lekë, kapital mbi 1.2 miliard lekë dhe rezultat financiar prej 35 milionë lekësh. Grupi Union–SHKK është i shtrirë në 900 fshatra në 16 rrethe të Shqipërisë dhe ka një anëtarësi mbi 26.000 vetë. Vetëm në periudhën 6-mujore të këtij viti, Grupi Union-SHKK ka disbursuar 3.505 kredi me një shumë totale prej 1.2 miliard lekësh. Për sa i përket portofolit të kredisë në Grupin Union-SHKK, cilësia e tij vazhdon të mbetet në nivele të kënaqshme, e krahasuar kjo me tregun financiar. Për më tepër që synimet e këtij grupimi kanë qenë që të rrisin nivelin e kredisë për vitin 2009. Shoqëritë e Kursim-Kredive japin garancinë se nuk do të preken nga kriza, pasi ato kanë likuiditet dhe kanë gjetur financime jo vetëm për vitin 2009. Ky union i SHKK-ve do të rrisë për vitin 2009 me rreth 20-25 për qind portofolin e kredisë, duke shtuar kështu numrin e fermerëve që do të marrin kredi dhe të zhvillojnë aktivitetin e tyre.


900 fshatra, financime me mikrokredi

Mikrokredia tashmë është bërë një mbështetje për shumë fermerë dhe aktivitete të ndryshme në zonat rurale të vendit. Deri tani, Grupi Union-SHKK operon në 900 fshatra, të shtrira në 16 rrethe të vendit, me 104 shoqëri kursim-krediti. Dhe brenda këtij 6-mujori, rrjeti i këtyre shoqërive është i pranishëm edhe në dy rrethe të tjera të vendit, përkatësisht në Pogradec dhe Malësi e Madhe. Po gjatë kësaj periudhe është rritur me mbi 1.500 vetë numri i anëtarëve në këtë rrjet, duke çuar anëtarësimin e përgjithshëm në rrjetin e Shoqërive Kursim-Kredi në mbi 26.000 vetë. Këta tregues flasin edhe një herë për zgjerimin dhe zhvillimin e mëtejshëm të Grupit Union–SHKK në zonat rurale, në mbështetjen financiare të fermerëve në aktivitetet e tyre prodhuese. Mbështetja reale në shërbim të fermerëve vjen në dy aspekte thelbësore, si në kredidhënie dhe në depozita për ta, ku hera-herës diktuar edhe nga ecuria e tregut, janë bërë dhe bëhen oferta sa më fleksibile në mbështetje të prodhimit në zona rurale. Më e fundit e kësaj stine është edhe depozita verore për fermerët deri në 500.000 lekë. Unioni Shqiptar i Kursim-Kreditit është krijuar në janar të vitit 2002 në bazë të eksperiencave dhe suksesit të projekteve të mëparshme të mikrokredisë, të iniciuara që prej vitit 1992 në terrenin shqiptar. Ky union është bashkimi vullnetar i Shoqërive Kursim-Kredi, të anëtarësuara pranë tij. Duke zbatuar më së miri objektivin e tij në mbështetjen social-ekonomike për banorët e zonave rurale, ai ka marrë dhe vlerësime nga institucione ndërkombëtare të kësaj fushe. Si i tillë, Unioni SHKK në 2008 u klasifikua në 16 institucionet më të mira në botë nga MIX. Gjithçka u realizua nga platforma botërore e mikrofinancës MIX, që nga 1000 institucionet e mikrofinancës në botë vlerësoi 100 prej tyre, të mbështetura në kriteret e efektivitetit, eficencës dhe transparencës.


Kredia, kërkesat disa për bujqësi e disa për tregti

Interesi për të marrë kredi nga institucionet e mikrofinancës është gjithnjë në rritje, por arsyet pse fermerët apo individët e kërkojnë atë për të zhvilluar aktivitetin kanë një ndryshim në varësi të zonës ku jetojnë. Disa syresh e kërkojnë kredinë për të zhvilluar më tej aktivitetin bujqësor të tyre, e disa të tjerë për të zgjeruar tregtinë e nisur. Nëse në jug pranë SHKK-ve, merret kredi edhe për zhvillimin e aktivitetit të turizmit, në veri kredia më së shumti merret për bujqësi apo blegtori. Në qytetin e Vlorës, kërkesa për kredi bëhet edhe për turizmin, por edhe vreshtari dhe pajisje tregtie. Sipas të dhënave, në Vlorë rreth 40 për qind e kredisë në 2008 është dhënë për sektorin e tregtisë, ndërsa 60 për qind është dhënë për sektorin e shërbimit dhe të bujqësisë. Ndërsa në veri kërkesat kryesisht për kredi janë për bujqësi, sera dhe blegtori.



Mikrofinanca ka ndihmuar në uljen e varfërisë në botë

Mikrofinanca tashmë është bërë pjesë përbërëse e shumicës së politikave publike në luftën kundër varfërisë dhe shpesh përgjigje e disa objektivave të zhvillimit të Millenium-it. Zana Konini, kryetare e Shoqatës së Mikrofinacës, tregon rëndësinë që ka kreditimi i fermerëve dhe njerëzve në nevojë. Sipas saj, mikrofinanca ka ndihmuar në uljen e varfërisë në botë, por edhe në Shqipëri. "Pas një rritjeje të fortë të ofertës këto 20 vjetët e fundit (130-150 milionë klientë sot), mikrofinanca tashmë është e pranishme në shumicën e vendeve të botës dhe madje me një prezencë të dukshme në disa vende apo rajone. Dy ngjarje të rëndësishme kanë ndikuar për një mediatizim të fortë: viti 2005 u quajt "viti i mikrokredisë" nga OKB dhe në tetor 2006, Muhammad Yunus i "Grameen Bank" mori çmimin "Nobel të Paqes", në emër të luftës kundër varfërisë dhe demokratizimit", - tregon Konini. Sipas saj, në Shqipëri mikrofinanca filloi të gjejë terren që nga fundi i vitit 1992, në kuadrin e një programi për lehtësimin e varfërisë, në zonën rurale.

Sot në vend operojnë me sukses disa institucione mikrofinance si Unioni SHKK, Fondi Besa, Opportunity Albania, FFZM, Unioni Jehona etj., aktiviteti i të cilëve bën të mundur që mijëra shqiptarë të kenë akses në shërbimet financiare dhe të fillojnë e të zhvillojnë aktivitetet e tyre sipërmarrëse. Në fund të vitit 2008, sektori i mikrofinancës në Shqipëri rezulton me një tepricë kredie mbi 144 milionë USD të shpërndara në më shumë se 50.000 klientë aktivë. Përveç mikrokredisë, dy institucione të mikrofinancës në vend, Unioni SHKK dhe Unioni "Jehona" operojnë prej vitesh edhe me depozitat. Sektori i mikrofinancës është tashmë pjesë përbërëse e sektorit financiar në Shqipëri dhe vit pas viti ka treguar rritje, konsolidim e përmirësim të vazhdueshëm. Institucionet e mikrofinancës japin ndihmesën e tyre në drejtim të rritjes ekonomike në vend dhe reduktimit të varfërisë në zonat rurale e ato urbane, duke promovuar sektorin e mikro-ndërmarrjeve dhe të bizneseve të vogla.

Të gjendur në kushtet e një krize ekonomike globale, gjatë 2008 sektori i mikrofinancës në Shqipëri nuk ka ndjerë ndonjë efekt negativ si p.sh., mungesë likuiditeti apo rritje të borxhit të keq. Përkundrazi, ky sektor është karakterizuar nga një rritje e dukshme në treguesit kryesorë të saj, si ato të shtrirjes ashtu dhe të aktivitetit financiar (mikrokredi dhe depozita). Gjatë 2008, asetet në sektorin e mikrofinancës janë rritur me 23.8 milionë USD, teprica e kredisë me 14 milionë USD, portofoli i depozitave me mbi 2 milionë USD dhe huamarrësit aktivë me 8.265 klientë. Në rritjen dhe konsolidimin e mëtejshëm të mikrofinancës në vend, kanë dhënë kontributin e tyre të rëndësishëm të pesë institucionet anëtare të Shoqatës së Institucioneve Mikrofinanciare

[Aulona]

Dobësimi i lekut, miliardat që fitoi qeveria

Zhvlerësimi i monedhës kombëtare rriti automatikisht taksimin e shqiptarëve


Zhvlerësimi i lekut shqiptar gjatë pjesës së parë të këtij viti i ka shërbyer qeverisë edhe për rritjen e taksimit të shqiptarëve, bëhet e ditur nga ekspertë të fushës. Qeveria besohet se ka përfituar miliarda lekë më shumë të ardhura nga tatimet e doganat, si pasojë e vlerës më të ulët të lekut, miliarda që në fakt i kanë paguar konsumatorët. Edhe qeveria nuk e mohon se ka përfituar të ardhura shtesë, por vlerësimet e sakta se sa kanë qenë përfitimet, mungojnë.

"Mosrealizimi i të ardhurave në dogana ka ardhur si pasojë e rënies së vlerës së importeve, edhe pse zhvlerësimi i lekut kundrejt të njëjtës periudhë të një viti më parë ka ndihmuar në zbutjen e këtyre efekteve negative. "Kontribuuesit" kryesorë të mosrealizimit të të ardhurave në dogana janë tatimi mbi vlerën e shtuar dhe akciza", thotë Ministria e Financave në një raport mbi të ardhurat buxhetore për 7-mujorin.

Qeveria shqiptare realizoi të ardhura prej 61.7 miliardë lekësh (475 milionë euro) nga tatimi mbi vlerën e shtuar (TVSH) gjatë 7-mujorit. Të ardhurat nga kjo taksë janë rritur me 4.5 për qind kundrejt vitit të kaluar, por e gjithë rritja është shkaktuar nga zhvlerësimi i lekut kundrejt euros dhe dollarit me 6.5 për qind.

Faktin që të ardhurat buxhetore kanë shënuar rritje, qeveria e ka propaganduar si tregues të rritjes ekonomike pozitive në vend gjatë kësaj periudhe. TVSH është taksë mbi qarkullimin e mallrave në ekonomi dhe shërben edhe si tregues i drejtpërdrejtë i ecurisë së përgjithshme të prodhimit të brendshëm bruto.

Zhvlerësimi

Mallrat e importuar në Shqipëri raportohen si importe në euro ose në dollarë dhe konvertohen me kursin mesatar të raportuar nga Banka e Shqipërisë para se t‘u pritet fatura fiskale. Vitin e kaluar, një dollar kushtonte mesatarisht 80 lekë, ndërsa një euro 122 lekë. Këtë vit, një dollar kushton 92-95 lekë, ndërsa një euro 130-133 lekë. Ky zhvlerësim i lekut, shoqëruar me shtimin e përdorimit të referencave doganore, bëri që të ardhurat e doganave nga Tatimi mbi Vlerën e Shtuar për mallrat e importit për 7-mujorin të jenë pak më të larta se vitin e kaluar, ndërkohë që importet në Shqipëri janë ulur me rreth 140 milionë euro.

Taksim pa ligj

Zhvlerësimi i lekut ka sjellë tendencë të konsiderueshme në rritje të çmimeve të mallrave dhe shërbimeve në vend, ndërsa ka rritur koston e jetesës edhe për dhjetëra mijëra familje që kanë kredi në valutë të fortë. "Inflacioni është një lloj taksimi që vendoset pa ligj nga qeveria", ka thënë ekonomisti nobelist, Milton Friedman. Zhvlerësimi i lekut dhe taksat shtesë që e shoqërojnë, sipas Bankës së Shqipërisë, kanë qenë shkaqet kryesore të inflacionit relativisht të lartë që Shqipëria po përjeton aktualisht. Inflacioni vjetor në korrik ishte 2.2 për qind, ndërsa një vit më parë ky ndryshim ishte 3.7 për qind. Për ekspertët, problemi tashmë është inflacioni i pjesës së mbetur të vitit. Tregjet priten të furnizohen me prodhimin vendas deri në fund të shtatorit, më pas do të nisë importi i artikujve ushqimorë, çmimi i të cilëve është edhe më i lartë se ai i prodhimeve të fermerëve. Rifillimi i importeve të vjeshtës pritet të shkaktojë tension në rritje në tregun e këmbimit valutor në Shqipëri.

Por, përveç çmimeve të shportës së mallrave, të cilat monitorohen nga INSTAT, një sërë mallrash të tjerë, si për shembull kostoja e kredive bankare, apo çmimet e banesave të kuotuara në euro, nuk llogariten si pjesë e inflacionit.

[Sally]

Të ardhurat nga TVSH-ja llogariten mbi 41 miliardë lekë



Të ardhurat nga Tatimi mbi Vlerën e Shtuar (TVSH) në periudhën janar-korrik 2009 llogariten 41.323 miliardë lekë, ose gati 2 herë më të larta krahasuar me të njëjtën periudhë të vitit 2005, kur u mbodhën 22 miliardë lekë. Të ardhurat nga TVSH-ja rezultojnë të kenë një rritje të lehtë edhe krahasuar me periudhën janar-korrik 2008, në të cilën u mblodhën 40.897 miliardë lekë. Të ardhurat nga Tatimi mbi Vlerën e Shtuar(TVSH) parashikohet të arrijnë në 10 % të PBB-së, ose 117 miliardë e 491 milionë lekë në vitin 2009, ndërsa për vitin 2008 ato arritën në rreth 107 miliardë lekë, nga 106.9 miliardë që ishte plani, duke zënë në këtë mënyrë rreth 10% të PBB-së në 2008-ën, nga 9% që ishin në 2007-ën. Historikisht, në dogana janë mbledhur rreth 70 për qind e të ardhurave totale nga TVSH-ja, dhe 30% TVSH brenda vendit. Kërkesës së herëpashershme të biznesit për ulje të mundshme të nivelit të TVSH-së, ekspertë të ministrisë së Financave i përgjigjen me faktin se, mbajtja e TVSH-së në këtë nivel përbën veprimin më pozitiv dhe të fuqishëm që ekonomia shqiptare të performojë dhe konkurrojë në tregun rajonal dhe më gjerë, si dhe instrumentin më të mirë për të nxitur eksportet shqiptare

Ecuria e të ardhurave nga TVSH-ja për periudhën janar-korrik të 5 viteve të fundit:



viti të ardhurat/milion lekë



2005 / 22.631



2006 / 27.314



2007 / 34.569



2008 / 40.897



2009 / 41.323

[Sally]

Rriten çmimet e karburanteve, e njëjta gjë ndodh edhe me çmimin e transporteve

Gjatë muajit gusht të 2009 janë rritur çmimet e transportit pas rritjes së çmimeve të karburanteve. Sipas të dhënave zyrtare të Institutit të Statistikave (INSTAT), të publikuara sot, indeksi i grupit "Transport" gjatë muajit gusht shënoi një rritje prej 1.1 për qind. Kjo ka ardhur pas rritjes gjatë këtij muaji të çmimeve të karburantit. Kështu, çmimi i naftës u rrit me 3.3 për qind, ndërsa çmimi i benzinës me 3.4 për qind. Ndërkohë, një muaj më parë, indeksi i grupit “Transport” shënoi një ulje prej 0.1 për qind. Edhe gjatë muajit të kaluar çmimi i naftës shënoi një rritje prej 1.4 për qind, ndërsa çmimi i benzinës 2.1 për qind.

[Adriana]

Ndërtuesit: Tatimet gabojnë me falimentin

Hebovija kundërshton mënyrën se si veprojnë tatimet. "Kompanitë mund të jenë me humbje sepse po investojnë"

Dërgimi i 27 subjekteve tregtare në gjykatë nga Tatimet duke kërkuar fillimin e procedurave të falimentimit është shoqëruar me shqetësim ndër komunitetin e biznesit.


Ilir Hebovija, nëndrejtor i Shoqatës së Ndërtuesve të Shqipërisë, sqaron se falimentimi është një proces normal në ekonominë e tregut, ndërsa mënyra se si Drejtoria e përgjithshme e Tatimeve veproi duke publikuar emrat e kompanive pa bërë asnjë verifikim paraprak ishte e gabuar.


"Nëse do merrej si veçori e shkëputur ky mund të quhej një veprim i drejtë, por sipas mendimit tonë ai duhet të ishte shumë më i studiuar dhe më i matur. Paraprakisht administrata tatimore duhej të shqyrtonte me shumë kujdes situatën e çdo shoqërie për të cilat do të kërkohej falimenti", - tha ai.


Më tej, duke analizuar zhvillimet me të fundit në lidhje me këtë çështje Hebovija sqaron se, përveç kërkesës për falimentim të shoqërive që kanë detyrime tatimore të papaguara prej shumë kohësh, Drejtoria e Përgjithshme e Tatimeve ka kërkuar edhe falimentimin e shoqërive që kanë rezultuar me humbje gjatë aktivitetit të tyre.


"Sipas legjislacionit fiskal, administrata tatimore mund të kërkojë në gjykatë falimentimin e shoqërive tregtare jo vetëm për mos pagimin e detyrimeve tatimore por edhe për faktin se ato kanë rezultuar me humbje për një periudhe kohe prej më shumë se 3 vitesh në vazhdim.


Pikërisht këtu është gabimi i rëndë i tatimeve. Përveç kërkesës për falimentim të shoqërive që kanë detyrime tatimore të papaguara prej shumë kohësh, ato kanë kërkuar edhe falimentimin e shoqërive që kanë rezultuar me humbje", - shpjegoi ai duke shtuar se një gjë e tillë është totalisht e padrejte, pasi të rezultosh me humbje në ekonominë e tregut është një praktikë normale e diktuar nga rrethana nga më të ndryshmet.


"Bazuar në ligj, tha ai, administrata tatimore duhet të kërkojë falimentimin kryesisht për shoqëritë që kanë vite të cilat nuk kanë shlyer detyrimet, por në asnjë rast shoqëritë që rezultojnë me humbje.


Më tej, nëndrejtori i Shoqatës së Ndërtuesve të Shqipërisë, shpjegon se një kompani mund të dalë me humbje për një periudhë të caktuar pasi mund të jetë ende duke investuar.


"Për shembull një shoqëri që merr përsipër të ndërtojë një HEC, jo vetëm gjatë fazës së ndërtimit, e cila mund të zgjasë mbi pesë vjet, por edhe vitet e para gjatë shfrytëzimit mund të rezultojë me humbje. Shoqëritë e kërkimit të naftës gjithashtu, për shumë vite të fillimit janë me humbje.


Po ashtu, një shoqëri që ka vendosur të investojë në prodhim duke ndërtuar një fabrike apo një impiant prodhues, në vitet e para, që përfshijnë fazën e ndërtimit dhe të prodhimit mund te rezultojë me humbje për më shumë se tre vjet",- sqaron ai.


Nisur nga kjo, sipas Hebovisë, i takon administratës tatimore që të shqyrtojë rast pas rasti gjendjen e shoqërive tregtare për të cilat kërkon fillimin e procedurave të falimentimit.


Në fillim të javës Drejtoria e Përgjithshme e Tatimeve, publikoi në faqen zyrtare të saj emrat e 27 subjekteve tregtare, për të cilat i ka kërkuar gjykatës që të fillojë procedurat e falimentimit.


Ky hap u hodh pas një udhëzimi në kundërshtim me ligjin për "Procedurat Tatimore" nga Ministria e Financave. Sipas këtij udhëzimi, falimenti kërkohet për të gjitha ato kompani veprimtaria e të cilave ka rezultuar me humbje për tre vite rresht, ndërkohë që ligji shprehet krejt ndryshe.


Sipas ligjit për "Procedurat Tatimore", administrata tatimore i kërkon gjykatës të shqyrtojë falimentin e kompanive, të cilat për tre vite rresht kanë shënuar humbje të kapitaleve të tyre. Pra që nuk munden më të shlyejnë më detyrimet që kanë ndaj shtetit apo të tretëve.

[Sally]

BB: Shqipëria vend i favorshëm për biznes

Nju Jork – Shqipëria merr një tjetër plus, kësaj here nga Banka Botërore. Në vendin e vogël ballkanik, tashmë është më e lehtë të hapësh një biznes.
Kështu shkruhet në raportin e Bankës Botërore, ku theksohet gjithashtu se kushtet për tregtinë ndëkufitare të Shqipërisë janë të favorshme.

Krahasuar me një vit më parë, vendi ynë është ngjitur 7 vende më lartë, për sa i përket lehtësirave për çeljen e një biznesi, duke shkuar në vendin e 82, nga i 89-ti që ishte vitin e shkuar. Sipas raportit të këtij institucioni të rëndësishëm ndërkombëtar, Shqipëria hyn ndër 46 shtetet ku është e lehtë hapja e një biznesi të ri. Raporti thekson gjithashtu, se në vendin tonë është ulur shuma e kapitalit fillestar për të hapur një biznes.

Fillimi i bizneseve në Shqipëri u lehtësua, duke e bërë regjistrimin elektronikisht, gjë që natyrisht shtoi edhe kapacitetin e ruajtjes së të dhënave. Gjithashtu, përdorimi i softuerëve për financat dhe instalimi i pajisjeve të skanimit kontribuan në pakësimin e kohës së kalimit të mallrave nëpër pikat doganore, thuhet në raportin e Bankës Botërore, thuhet në raportin “Biznesi në 2010: Reforma në Kohë të vështira”.

[Adriana]

Tatimet: Fillimi i procedurave të falimentimit është një detyrim ligjor

Drejtoria e Përgjithshme e Tatimeve ka nisur procedurat për falimentin për 29 subjekte në rrethe të ndryshme të vendit. Burime zyrtare të DPT-së bënë të ditur se "administrata tatimore ka depozituar në gjykatë kërkesën për fillimin e procedurave të falimentimit të 29 bizneseve në qytete të ndryshme të vendit, si Tirane, Durrës, Gjirokastër, Fier, etj". Fillimi i procedurave të falimentimit, shpjeguan burimet, është kërkesë ligjore dhe zbatohet për të gjitha subjektet që kanë kaluar në statusin pasiv të QKR-së për një periudhë prej 2 vjetësh. Sipas burimeve të mësipërme, kjo procedurë shtrihet dhe për ato subjekte, detyrimi tatimor i të cilave është deklaruar i pambledhshëm, pasi janë përfunduar të gjitha procedurat e parashikuara nga ligji tatimor procedural si dhe për subjektet, që nuk kanë kryer veprimtari tregtare, apo nuk kanë shlyer detyrimet ndaj administratës tatimore për një periudhë prej të paktën 2 vitesh nga hyrja në fuqi e ligjit "Për procedurat tatimore". Lidhur me pikën për nisjen e procedurave të falimentimit për subjektet që kanë deklaruar rezultat me humbje të kapitaleve për periudha prej të paktën 3 vite rresht, burimet zyrtare shtuan se ajo bëhet paralelisht me zbatimin e dispozitave të ligjit për falimentin, që parashikon dhe verifikimin e gjendjes së paaftësisë paguese, si parakusht. "Administrata tatimore në këtë veprim të sajin është plotësisht në përputhje me ligjin dhe ka bindjen në një proces verifikimi të drejtë dhe të ndershëm nga gjykatat shqiptare", thanë burimet

[Sally]

Komisioni i Ekonomisë miraton nen për nen buxhetin

Komisioni Parlamentar i Ekonomisë dhe Financave miratoi sot nen për nen buxhetin e rishikuar për vitin 2009.
Nga rishikimi i buxhetit të vitit 2009 do të akordohen për investime publike edhe rreth 17 miliardë lekë më shumë se parashikimi në fillim të vitit 2009, ose në përqindje të Prodhimit të Brendshëm Bruto, investimet shkojnë nga 32.3 % në 34.5 % të PBB-së, duke përmirësuar e fuqizuar stabilitetin financiar të vendit. Rishikimi buxheti konsiston në rishpërndarje, pra marrje të fondeve nga projektet apo ministritë, ku ato nuk janë shpenzuar.

Projekti për rishikimin e buxhetit 2009 reflekton përdorimin e të ardhurave nga privatizimi i ARMO-s, në masën neto prej 9.790 milionë lekë të papërdorur nga viti i kaluar sipas formulës 50 % ulje të huamarrjes së brendshme dhe 50 % rritjes së investimeve, të ardhurave nga privatizimi strategjik i OSSH sha-së, prej 11.700 milionë lekë sipas formulës 50 % për ulje të stokut të brendshëm dhe 50 % rritje investimesh, si dhe të atyre nga shitja e aksioneve të AMC prej 5.440 milionë lekë për rritjen e investimeve.

Përmes kursimeve të shpenzimeve korrente prej 1.327 milionë lekë dhe të shpenzimeve kapitale prej 6.418 milionë lekë do të arrihet edhe mbulimi i mosrealizimit të të ardhurave në masën prej 7.706 milionë lekë. Në këtë ndryshim të buxhetit parashikohet rritja e shpenzimeve kapitale me burime të brendshme në infrastrukturë me rreth 12.4 miliardë lekë dhe të shpenzimeve korrente me 1.7 miliardë lekë, krahasuar me buxhetin fillestar të vitit 2009, ku 1.2 miliardë lekë e zë rritja e kompensimit të ish-përndjekurve politikë.

Në buxhetin e rishikuar të vitit 2009 shpenzimet e përgjithshme parashikohen në masën 401.907 milionë lekë me një rritje prej rreth 4 %, krahasuar me buxhetin fillestar të vitit 2009, ose në shumë absolute rreth 17.073 milionë lekë më shumë. Shpenzimet janë parashikuar të përfaqësojnë rreth 34.2 % të PBB-së.

Gjithashtu janë parashikuar 100.556 milionë lekë për investime publike, me një rritje prej 10.120 milionë lekë kundrejt buxhetit fillestar, ose 8.55 % e PBB-së, nga të cilat 81 milionë lekë me financim të brendshëm dhe 19.556 me financim të huaj. Deficiti buxhetor në buxhetin e rishikuar rezulton në masën 74.790 milionë lekë, ose 6.4 % e PBB-së.

Ky rishikim i buxhetit sjell edhe rritjen e fondit rezervë dhe kontigjencës në masën 221 milionë lekë, duke bërë që ky zë të kapë nivelin 15.921 milionë lekë, ose 1.35 % e PBB-së. Ndërkohë është parashikuar një nivel i huamarrjes së brendshme në masën 40.424 milionë lekë ose 3.4 % e PBB-së.

Ndryshimet në buxhetin e vitit 2009 u miratuan vetëm me votat e maxhorancës, pasi opozita vijon të mos marrë pjesë në punimet e Parlamentit. Një ditë më parë Parlamenti miratoi në parim këto ndryshime.

[Sally]

Fullani: Janë rritur kreditimet në Lekë

Gurvernatori i Bankës së Shqipërisë Ardian Fullani tha gjatë një konference për shtyp, se rritja ekonomike në vend është pozitive, por që prej vitit të kaluar ka pasur ngadalësim.
Fullani tha se norma bazë e interesit do të vijojë të jetë e pa ndryshueshme, ndërsa ka theksuar se inflacioni vjetor është mesatarisht 2.2%.

Sipas tij, presionet inflacioniste janë në rënie. Duke folur për situatën aktuale të Lekut, Fullani tha se kursi i këmbimit valutor është qetësuar tashmë dhe se janë shtuar kreditimet në monedhën tonë kombëtare.

“Depozitat në Lekë janë të qëndrueshme. Kursi i këmbimit të lihet i qetë”, tha Fullani në një konferencë për shtyp. Guvernatori i Shqipërisë tha gjithashtu se eksportet kanë pësuar rënie prej 7% që prej vitit të kaluar

[Sally]

Banka Evropiane mbështetje për energjinë në Shqipëri


Bruksel - Ministri i Ekonomisë, Tregtisë dhe Energjetikës Z. Dritan Prifti zhvilloi një takim me Komisionerin Evropian për Energjinë, z. Andris Piebalgs, në Bruksel.
Pas një prezantimi me ecurinë e reformave kryesore të ndërmarra nga qeveria shqiptare në sektorin e energjisë në Shqipëri, Z. Prifti paraqiti objektivat e tij si dhe qëllimin e qeverisë mbi përmirësimin dhe fuqizimin e këtij sektori në vend.

Piebalgs shprehu vlerësimet më të larta rreth zhvillimeve në sektorin energjitik në Shqipëri. Ai përshëndeti reformat e ndërmarra nga qeveria shqiptare si pjesë e politikave të zhvillimit dhe të integrimit duke kontribuar me një rol tepër pozitiv edhe për funksionimin e Komunitetit të Energjisë midis vendeve të rajonit dhe Bashkimit Europian.

Ai siguroi mbështetjen e Bashkimit Europian për ecurinë e mëtejshme për projekte të ndryshme si: për ndërtimin e rrjeteve të gazsjellësve trans-adriatik (TAP) dhe atij të rigazifikimit të gazit të lëngshëm duke përdorur kapacitetet stokuese të vendit, funksionimin e qendrës rajonale të koordinimit të ankandeve energjitike apo linjave të interkonjeksionit me vendet fqinje.

Gjithashtu, z. Piebalgs ofroi gatishmërinë për mbështetje financiare nga Banka Evropiane për Investime dhe Bankës Evropiane për Rindërtim dhe Zhvillim për të bërë të mundur realizimin e këtyre projekteve

[Sally]

Vendet anëtare të Bashkimit Evropian (BE) vazhdojnë të jenë partnerët kryesorë të vendit tonë në tregtinë e jashtme. Sipas të dhënave më të fundit zyrtare të Institutit të Statistikave: gjatë muajit gusht të vitit 2009, tregtia me vendet e Bashkimit Europian ishte 64,7 për qind e totalit. Partnerët kryesorë tregtarë të vendit tonë vazhdojnë të jenë Italia dhe Greqia. Kështu, me Italinë eksporti është 48,2 për qind dhe importi 20,2 për qind e totalit, ndërsa me Greqinë, eksporti është 5,9 për qind dhe importi 18,3 për qind. Sipas INSTAT, disa nga partnerët tanë tregtarë me të cilët eksporti dhe importi është rritur, janë: për eksportin, Bullgaria, Kroacia, SHBA, Spanja, Turqia etj, ndërsa për importin, Bullgaria, Greqia, Holanda, Rumania, Rusia, SHBA etj.

[Adriana]

Berisha: Vendi ynë më shumë se kurrë ka nevojë për investime në projekte vendimtare për vendin

Kryeministri Berisha mori pjesë sot në punimet e konferencës së dytë të investimeve të huaja në Shqipëri. Së bashku me kryeministrin Berisha të pranishëm në këtë aktivitet ishin ministra të kabinetit qeveritar, Presidenti i IDB grup zoti Muhamed Ali, Drejtori i Përgjithshëm i Fondit të OPEC, për zhvillim, zoti Sulejman Jasir Al-Herbish, përfaqësues të institucioneve ekonomike ndërkombëtare, investitorë të huaj, përfaqësues të trupit diplomatik, etj.

Duke përshëndetur të pranishmit, kryeministri Berisha falënderoi investuesit e huaj për mbështetjen bujare që i kanë ofruar Shqipërisë përmes financimit të projekteve të rëndësishme për vendin në fusha të ndryshme si infrastrukturë, shendetsi, arsim, bujqësi etj, të cilat kanë kontribuar ndjeshëm në përmirësimin e cilësisë së jetës. “Është një nder dhe privilegj për mua tu përshëndes ju sot dhe tu mirëpres në konferencën e dytë të investimeve të huaja në Shqipëri të organizuar nga IDB në vendin tim. Pra së gjithash më lejoni të shfrytëzoj rastin për të shprehur mirënjohjen time më të madhe miqve të mi, presidentit të IBD doktor Muhamed Ali, Drejtorit të Përgjithshëm të OFID fondit të OPEC, zotit Sulejman Jasir Al-Herbish, institucioneve të tyre, por gjithashtu edhe vendeve të tyre Arabisë Saudite, Kuvajtit, Emirateve të Bashkuara Arabe, Katarit dhe shume e shumë vendeve të tjera, të cilat përmes këtyre institucioneve, direkt apo përmes institucioneve të tjera ndërkombëtare si Banka Botërore, FMN etj, siguruan për vendin dhe kombin tim një mbështetje shumë bujare. Projektet e financuara nga taksapaguesit tuaj dhe institucionet tuaja, projektet e financuara nga IBD dhe OFID jane të shtrira në të gjithë vendin, në fushat më kryesore, të cilat kanë kontribuar mjaftueshëm për të përmirësuar jetën e shqiptarëve. Këto projekte të përfunduara ose në zbatim e sipër përfshijnë infrastrukturën, kujdesin shëndetsor, arsimin, bujqësine, furnizimin me ujë, etj.”

Duke vlerësuar konferencën si një mundësi të madhe për njohjen e potencialeve dhe mundësive që ofron Shqipëria, kryeministri u shpreh se sot më shumë se kurrë ekonomia shqiptare ka nevojë për investime në projekte vendimtare për vendin, të cilat të cilat do të rrisin hapësirat e tregut dhe do të krijojnë një klimë shumë të favorshme për biznesin. “Sot është një ditë e veçantë për vendin tim. Më shumë se 100 investitorë nga Arabia Saudite, Kuvajti, Bosnja dhe shumë vende të tjera janë mbledhur në Tiranë për tu njohur dhe për të kërkuar në potencialet e Shqipërisë, në nevojat dhe mundësitë e këtij vendi. Konferenca po mbahet në një moment shumë të rëndësishëm, në një moment kur ekonomia shqiptare ka një nevojë të madhe për investimet e huaja. Ekonomia shqiptare ka nevojë për financime projekte vendimtare për vendin, të cilat do të rrisin hapësirat e tregut dhe do të krijojnë një klimë shumë të favorshme për biznesin.”

Ndër të tjera kryeministri theksoi se kompanitë e reja do të gjejnë në Shqipëri mundësi të jashtëzakonshme për të shfrytëzuar në turizëm, energji, miniera, etj. “Dua të theksoj, se kompanitë e reja do të gjejnë në Shqipëri një ekonomi vërtetë tërheqëse, dinamike, e cila shënon rritje në kohën më të vështirë për ekonominë botërore. Ekonomia shqiptare është një ekonomi e vogël , por e konsoliduar dhe dinamike, tha Kryeministri.

Kryeministri garantoi investitorët se qeveria shqiptare nuk do të reshtë së përpjekuri për të lehtësuar punën dhe veprimtarinë e tyre në Shqipëri dhe se investimet e secilit prej tyre do të ishin histori suksesi.

Më pas, duke marrë fjalën Presidenti i IBD Group Muhamed Ali, vlerësoi qeverinë shqiptare për e mbështetjen e pakursyer dhe lehtësitë që u ka ofruar investitorëve të huaj, si dhe si siguroi se IBD do të vazhdojë të financojë projekte të rëndësihme për vendin. Në këtë kontekst edhe Drejtori i Përgjithshëm i OFID zoti Suleiman Jasir Al-Herbish vlerësoi stabilitetin ekonomik në Shqipëri dhe shprehu besimin se në të ardhmen Shqipëria do të tërheqë edhe më shumë investues të huaj, si pasojë e politikës së saj në përkrahje të biznesit.

[Sally]

Konfindustria: Importi me taksa të ulëta “mbyt” prodhimin

Konfindustria njoftoi sot se i ka kërkuar zyrtarisht Kryeministrit Sali Berisha dhe Ministrisë së Financave për të ndërhyrë në kohë sa më të shpejtë për përmirësimin e gjendjes së rëndë të krijuar për industritë shqiptare nga sistemi i referencave doganore të zërit “prodhim i gatshëm” të importit, shumë prej të cilave janë mjaft më të ulëta sesa vlerat e tregut ndërkombëtar.

“Gjendja është bërë edhe më tepër shqetësuese, kur pas ndryshimeve të fundit të kryera në muajt gusht-shtator 2009 nga Drejtoria e Përgjithshme e Doganave ndërkohë, që kemi rritje të konsiderueshme të referencave doganore të lëndëve të para të importit, për mjaft prodhime të mbaruara të të njëjtit tip çmimet kanë mbetur pa ndryshuar duke qenë në nivele ndjeshëm të ulta krahësimisht çmimeve ndërkombëtare. Bazuar në të dhenat zyrtare ende pothuaj 30% e zhdoganimeve në Shqipëri bëhen sipas referencave të paravendosura”, tha administratori i Përgjithshëm i Konfindustrisë, Gjergj Buxhuku.

Sipas tij, një ngushtim i tillë i ndjeshëm në ndryshimin në vlerë të lëndeve të para me prodhimin e gatshëm ka vënë në vështirësi serioze me pasoja deri në falimentim të plotë industritë dhe prodhimin vendor shqiptare. Kjo ka bërë që të ulet në shkallë të papranueshme konkurrenca në favor të prodhimeve të huaja.
Buxhuku tha se më së shumti janë prekur industria mekanike, industria e përpunimit të mishit, industria e prodhimit te duraluminit, industria e prodhimit të pijeve joalkoolike, industria e prodhimit të birrës, etj. Gjendja behet edhe më shqetësuese, nëse do të mbajmë parasysh pasojat e krizës globale, që ka përfshirë edhe ekonominëe shqiptare me shfaqjen më të qartë goditjen para së gjithash të prodhimeve vendore.

Konfindustria, në kërkesen e saj drejtuar institucioneve shtetërore ka paraqitur edhe propozimet e saj konkrete për ndryshim të referencave doganore të prodhimeve të gatshme, që i përkasin:- Industrisë mekanike dhe përpunimit të hekurit dhe - Industrisë së përpunimit të mishit dhe do të vazhdoj për industritë e tjera vendore të prekura.

[Sally]

Eksportet dhe importet shënuan rënie gjatë nëntorit, ndërsa deficiti tregtar arriti mbi 300 milionë dollarë

Gjatë muajit nëntor, Shqipëria ka pasur një aktivitet më të ulët ekonomik në krahasim me muajin paraardhës. Sipas të dhënave të INSTAT-it, në muajin nëntor, eksportet shqiptare kanë arritur në rreth 9 miliardë lekë, duke shënuar një rënie prej 5 përqindësh në krahasim me muajin tetor dhe një ulje të lehtë prej 0.4 për qind në krahasim me muajin nëntor 2007. Por, rënia është vënë re gjatë këtij muaji edhe tek importet. Kështu, për nëntorin Shqipëria ka importuar 39 miliardë lekë mallra dhe shërbim, duke shënuar një ulje 8.6 për qind në krahasim me muajin e kaluar. Pavarësisht rënies së importeve me 8.6 për qind në krahasim me muajin paraardhës, deficiti në shkëmbimet tregtare vazhdon të jetë në shifra të larta, ku për këtë muaj arriti në 30 miliardë lekë ose më shumë se 300 milionë dollarë, rreth 8 % më shumë se gjatë nëntorit të vitit 2007. Mallrat e akcizës për këtë muaj zunë 10 për qind të shumës totale të importeve me një vlerë 3.9 miliardë lekë, ose 19% më pak se një muaj më parë. Në këtë grup, peshën kryesore e zënë nënproduktet e naftës, që zënë 66 për qind të totalit të mallrave të akcizës të importuara për muajin nëntor. Partnerët tregtarë kryesorë mbeten vendet e Bashkimit Europian, tregtia me të cilët, për muajin nëntor zuri 66.5 % të totalit të saj. Shqipëria vazhdon të ketë marrëdhëniet më të dendura tregtare me Italinë dhe Greqinë. Kështu, me fqinjin perëndimor eksportet shënojnë 60.7 për qind dhe importet 30.9 për qind. Për sa i përket Greqisë, në të vendi ynë eksporton 7 për qind të totalit të eksporteve dhe 13.2 për qind të importeve