[quoteemJ.R.R. Tolkien]“Nazgulët ose Ulairët, Hijet e Unazët, të quajtur edhe Kalorësit e Zinj ose Kalorësit me krahë, janë nëntë kalorës shpitligj të nënshtruar Sauronit”[/quoteem]
Pas 101 vjetësh gjendemi ende të pushtuar!
Mos u habisni, nuk ka ushtri të huaj. Është e gjitha e ndërtuar në vend. Rekrutues dhe rekrutë të një ushtrie të zezë që po ia merr frymën Shqipërisë.
Në vend të sundojë kultura, dija dhe ligji, sundon ligësia dhe i ligu!
Kudo në shoqëri dhe vend!
E kur lexon historinë se cilët burra dhe njerëz ishin ata që me vetëmohim u flijuan për këtë vend, si përfunduam këtu, është pyetja më e thjeshtë.
Kur lexon atë çfarë kanë kaluar shqiptarët në histori, të duket se shumë vetë në këtë vend e kanë harruar se nga vijnë.
Kushedi sesa shqiptar kanë dhënë jetën për këtë vend, në luftë dhe duke punuar për ndërtimin e vendit. Ndoshta më të mirët kanë vdekur në luftë e sipër dhe më shumë mbetën pas ata që bënin llogari pushtetin. Ndoshta më të mirët u vranë duke protestuar, vdiqën në burgje, ndoshta më të mirë u dëbuan nga vendi, ndoshta mbetën të vrarë në kufi.
Të duash lirinë e vendit tënd kur e di se pushtuesi është më i fortë, më i madh, më i fuqishëm, me miq të fuqishëm, me shërbëtorë dhe bashkëpunëtor të panumërt; këtë e bëjnë pak!
Është e lehtë të jesh një adhurues i flaktë i të mëdhenjve.
Historia e shqiptarëve ka shembuj të tillë!
Gjergj Kastrioti Kalorësi i Dritës dhe i Dijes, Zoti Aleksandër dhe mbështetësit e tij. Burim frymëzimi Lirie për breza të tërë pas tij! Madhori i një ushtrie të vogël nuk lufton për Liri, nëse ndjekësit e tij nuk e kanë të qartë se çfarë është Liria!
E sot?!
E keni vërë re sesi është sulmuar, për ta lënë më pas në harresë?! E keni vënë re kanë dashur ta tjetërsojnë duke shpikur dhe krijuar histori, vetëm e vetëm për të na thënë se ne nuk e dimë se çfarë është Liria dhe Pavarësia? Për të mos na lënë kurrë të lirë dhe të pavarur. Kjo bëhet për t'ia ulur vlerat frymës së lirisë që një shoqëri kërkon.
Fatkeqësisht ka ndodhur shpesh që porsa arrihet një ndryshim, çuditërisht na shfaqen fytyra që askush nuk i ka parë dhe njohur më parë, dhe fillojnë e drejtojnë. Sikur këta të kishin lindur vetëm për këtë gjë! Nga na kanë buruar?!
Disa të vetëshpallur folitikanë, përpiqen shpesh me na kujtuar se pa këtë dhe pa atë, ne nuk do të ishim!
Veçse harrojnë kryesoren, “Ne jemi, sepse jemi Ne”!
E gjitha kjo, sepse ata nuk ndjejnë se janë aty si pasojë e flijimeve të kësaj shoqërie, por si rrjedhojë e të mëdhenjve dhe interesave ekonomike të tyre. Në të shumtën e rasteve janë një mish i huaj, apo një infeksion viral për shoqërinë.
Shqipërinë na kanë e sjellë deri këtu jetët dhe puna e të gjithë atyre të rënëve, jetët dhe flijimet në jetë dhe pasuri të sa e sa burrave dhe grave.
Fatkeqësisht idealet dhe ëndrrat e tyre janë varrosur me ta.
Pas tyre mbesin ata që jua vodhën jetët, ata që jua vodhën idealet dhe ëndrrat për një Shqipëri të lirë, demokratike dhe të pavarur.
Nuk di në historinë 101 vjeçare të Shqipërisë, që drejtësia të këtë qenë ndonjëherë e pavarur!
E kur nuk kanë qenë kurrë votimet të lira, nuk ka si të ishte ndryshe.
Në një vend demokratik, votimi nuk është vendim gjykate dhe nuk ka lidhje pafajësia ligjore me numrin e votave që dikush është votuar. E nga këtu fillon drejtësia!
Si rrjedhojë, sot vazhdojmë të kemi hajdutë që na japin mësime jete dhe ekonomie, kriminelë dhe vrasës që flasin për ligje dhe bëjnë gjyqtarin, banditë sipërmarrës, trafikantë që merren shërbime, zaptuesit të jenë pronarë, analfabetët modernë të merren me kërkime shkencore dhe shkencë etj, etj.
Madje në historinë tonë kemi pasur edhe udhëheqës që kanë shkruar aq shumë vepra, sa më pak vite shkollë të kishin. Tragjikomik, si rast.
Dhe sot kjo ushtri e zezë, blozë, shtohet dhe rekrutohet nga kalorësit e zinj, ata që ndjekin unazën e pushtetit dhe skllavërimit të njerëzve. Ata që vijnë nga errësira dhe që rrënjët e tyre shkojnë thellë në botën e krimit, trafiqeve dhe shumë të zezave të tjera. Ata që fillimisht rekrutuan disa dhe kthyen në skllevër njerëzit e dijes. Nga këta kalorës që u shërbejnë të gjithëfuqishmit Sauron, duke na marrë fillimisht jetën e minatorëve e më pas, duke nga vjedhur sy ndër sy naftën, arin, uraniumin dhe shumë xeherorëve të çmuar.
Gjithë kjo ushtri që e nxiu Shqipërinë ndërkombëtarisht, me nxjerrjen rrugëve të Evropës vajzat shqiptare, si mish i bardhë; duke tregtuar “miell” nga mulliri i zi i shpirtit të tyre.
Nxiu duke çuar në qiell tymin e guroreve, preu dhe shfarosi pemët dhe pyje të tërë, gërmoi në mënyrë të pashpirt lumenjtë, hëngri me pangopësinë e saj malet duke nxjerrë dhe shitur në tregun e zi mermer të bardhë, ndoti me gjithfarë plehrash vendin, nguli themele bunkerësh të shëmtuar mbi tokën pjellore, i vuri zjarrin këtij vendi për me u fshehur në tymin dhe blozën e zezë që zjarri le pas.
E pra, kjo ushtri vendin e mban të pushtuar ende, edhe sot!
