"Moreover, you scorned our people, and compared the Albanese to sheep, and according to your custom think of us with insults. Nor have you shown yourself to have any knowledge of my race. Our elders were Epirotes, where this Pirro came from, whose force could scarcely support the Romans. This Pirro, who Taranto and many other places of Italy held back with armies. I do not have to speak for the Epiroti. They are very much stronger men than your Tarantini, a species of wet men who are born only to fish. If you want to say that Albania is part of Macedonia I would concede that a lot more of our ancestors were nobles who went as far as India under Alexander the Great and defeated all those peoples with incredible difficulty. From those men come these who you called sheep. But the nature of things is not changed. Why do your men run away in the faces of sheep?"
Letter from Skanderbeg to the Prince of Taranto ▬ Skanderbeg, October 31 1460

James Pettifer: Diktatori Enver Hoxha i formoi celulat e para të UÇK-së

Sillni artikullin më të fundit që ju ka bërë më shumë përshtypje diskutoni rreth tij, argumentoni qëndrimin tuaj.

Moderator: bardus

Post Reply
User avatar
Adriana
Universe Member
Universe Member
Posts: 3191
Joined: Tue Jun 02, 2009 3:34 pm
Gender: Female
Location: Giethoorn (Nederland)
Contact:

James Pettifer: Diktatori Enver Hoxha i formoi celulat e para të UÇK-së

#1

Post by Adriana » Sun Apr 12, 2015 5:34 pm

Dikush a mundet te me thote sa % te vertet ka ne kete 'zbulim' ??


[quoteemJames Pettifer: Diktatori Enver Hoxha i formoi celulat e para të UÇK-së]
562X315391028_z_3794.jpg


Historiani dhe publicisti, James Pettifer zbulon detaje deri më tani të panjohura të nxjerra nga arkivat ruse, amerikane, serbe, zvicerane të Ushtrisë Çlirimtare të Kosovës. Modelet e para të Enver Hoxhës dhe Mehmet Shehut për krijimin e një grupi rezistencë në Kosovë, takimet e pasuesit Alia me komunistët kosovarë, deri te trajnimet e rekrutëve kryengritës nga Kosova në Akademinë Ushtarake në Tiranë.

“Fara e parë për këtë libër u mboll nga kryeministri aktual i Kosovës, Hashim Thaçi, i cili u përpoq, por pa sukses, disa vite më parë, që të më bindte të shkruaja një biografi për atin themelues të UÇK-së, Adem Jasharin. Pasi e mendova, nuk m’u duk se kjo ishte mënyra e duhur për të shkruar historinë e luftës”,- thotë James Pettifer, autor i librit “Ushtria Çlirimtare e Kosovës”. Kjo është e para histori e Ushtrisë Çlirimtare të Kosovës, që rrënjët e saj autori i gjen pikërisht në vitin 1948, asokohe një lufte të fshehtë që u kthye më pas në një kryengritje në zemër të Ballkanit. Për të shkruar këtë libër, James Pettifer-it i janë dashur shumë vite. Autori ka bërë një punë kërkimore të gjatë, ka zhvilluar takime me pjesëmarrës të shumtë në luftë të të gjitha niveleve në Kosovë, Serbi, Maqedoni dhe Shqipëri. Me Ramush Haradinajn ndërmori një turne në vendet e betejave në Dukagjin. Bisedoi dhe mësoi shumë rreth rolit të Britanisë së Madhe nga gjeneralët Sir Mike Jackson dhe John Crossland. Në Prishtinë dhe Tiranë zhvilloi intervista me protagonistë të kësaj lufte si Valon Murati, Adem Demaçi, Xhevdet Shehu, gjeneral Agim Çeku etj. U takua dhe bisedoi me shumë civilë të të gjitha grupeve etnike, të cilët banonin në zonën e konfliktit për një pjesë të kohës apo gjatë gjithë luftës. “Kam përfituar gjithashtu nga leximi i shumë librave me kujtime nga lufta të pjesëmarrësve shqiptarë dhe serbë dhe, edhe pse mund të mos jem dakord me përmbajtjen apo analizën e një vepre të caktuar, prapëseprapë studimi i tyre ka qenë i dobishëm dhe sqarues”,- thotë Pettifer.



562X315391028_z_3794Për sa i përket anës serbe, ai është përpjekur të konsultohet dhe të studiojë të gjithë materialin që disponohet, zyrtar dhe jozyrtar. “Por duhet thënë se historia bashkëkohore nuk ka qenë një fushë e lehtë në gjeneratën e fundit në Beograd dhe ende vazhdon të jetë e tillë edhe pas rënies së regjimit të Millosheviçit. Shumë nga rrëfimet e serbëve për luftën dhe për çështje të lidhura me të bazohen në mohimin e shumë të vërtetave themelore dhe përmbajnë, sipas mendimit tim, shumë gabime të thella në dhënien e fakteve dhe në interpretimin e tyre”,- sqaron autori me bindjen se në të ardhmen këto të pavërteta do të zëvendësohen shumë shpejt, shpresoj, nga kujtime personale të sinqerta, të bazuara në përvojën subjektive, dhe më pas do të mbështeten nga shkrime profesionale historike.



Autori ka shfrytëzuar edhe procesverbalet e mbajtura në gjyqet e zhvilluara në Gjykatën Ndërkombëtare për Krimet e Luftës në ish-Jugosllavi (ICTY), në Hagë. Sipas tij, pjesa më e madhe e materialit të ICTY-së përqendrohet në luftën në Drenicë, ndërkohë që nuk përmend fare shumë ngjarje themelore që përfshijnë konfliktin UÇK dhe UPJ (Ushtria Popullore Jugosllave). Ai ka arritur në këtë konkluzion pasi është ballafaquar me procesverbalet e gjykatës së Prishtinës të periudhës jugosllave, që sipas tij kanë qenë shumë të dobishme ashtu si dhe materiale arkivore të policisë së fshehtë dhe studimet që janë botuar vitet e fundit për organizatat politike ilegale shqiptare e ushtarake si dhe shtypin ilegal në regjimin e Titos. Me pak fjalë autori është munduar që në këto arkiva të gjejë fillesat e Ushtrisë Çlirimtare të Kosovës, rolin që luajti qeveria komuniste e Shqipërisë me Enver Hoxhën dhe Mehmet Shehun, e më pas dhe Ramiz Alia, duke filluar që nga viti 1948. Gjatë këtij procesi ai zbulon detaje deri më tani të panjohura të nxjerra nga arkivat ruse, amerikane, serbe, zvicerane rreth historisë së krijimit të Ushtrisë Çlirimtare të Kosovës, që nga një grup i fshehtë politik u kthye në një forcë ushtarake që i solli Pavarësinë Kosovës.



Projektet e Hoxhës dhe Shehut për një ushtri të rezistencës në Kosovë



Në Shqipëri, pas prishjes me Titon dhe pas lëvizjes ndërkombëtare komuniste të vitit 1948, Enver Hoxha nuk i kishte braktisur krejtësisht kosovarët në mëshirë të fatit, siç kanë deklaruar shpesh kritikët e tij në botën shqiptare. Për të, problemi i Kosovës ishte një mënyrë për të filluar përkufizimin e Shqipërisë së re kundër Jugosllavisë dhe rrëshqitjes së kësaj të fundit në teorinë dhe praktikën kapitaliste. Aktiviteti subversiv i udhëhequr nga shërbimet sekrete ishte taktika e tij e preferuar, me anë të së cilës pjesa më e madhe, për të mos thënë krejt aktiviteti i mbështetur nga Tirana ishte i mohueshëm dhe Hoxha mund të fillonte të ushtronte të paktën njëfarë trysnie të vogël mbi Beogradin duke përdorur burimet tepër të kufizuara të Shqipërisë. Për sa i përket kësaj, pas vitit 1948, ka shumë mundësi që ai të paktën të jetë këshilluar me burimet sovjetike. Hoxha kishte një marrëdhënie të ngushtë me ambasadorin sovjetik në Shqipëri, Dimitri Çuvahin, i cili ishte një nga figurat kryesore të Ministrisë së Punëve të Jashtme të Moskës, me përvojë në shërbimet sekrete dhe me mundësinë për t’u takuar drejtpërdrejt me Stalinin Në vitin 1949, Enver Hoxha dhe komandanti ushtarak, Mehmet Shehu, kishin pasur komunikim me Stalinin për mundësinë e krijimit të një force të armatosur për të përmbysur qeverinë e Titos në Beograd, duke filluar me një kryengritje të armatosur në Kosovë. Në ditarin e tij të 5 korrikut të vitit 1949, Çuvahini përmend një diskutim që kishte pasur me Shehun për mundësitë ushtarake për të luftuar kundër regjimit “revizionist” brenda Jugosllavisë Jugore, edhe pse nuk kishte një tablo të qartë të strategjisë së Moskës. Ai shkruan:



Midis nesh është shtruar çështja se si të organizojmë luftën kundër titistëve në Jugosllavi. Nuk e dimë se cila mënyrë është më e mirë, që çdo republikë në Federatën Jugosllave të luftojë kundër klikës së Titos në mënyrë të pavarur dhe, në një rast të tillë, lufta mund të caktohet në krahinën autonome të Kosovës dhe të Metohisë, apo që lufta kundër trockistëve jugosllavë nga klika e Titos duhet të zhvillohet nga një qendër e vetme…



Duke pasur parasysh dëmin që kishte shkaktuar komanda ushtarake staliniste ndaj kauzës republikane në Luftën Civile Spanjolle, gjë që Mehmet Shehu e kishte parë personalisht, kuptohet që opsioni i dytë nuk i pëlqeu shumë dhe e kundërshtoi idenë, duke u përgjigjur, sipas Çuvahinit: “Për mua personalisht kjo çështje është shumë e qartë, në kuptimin që klika e Titos mund të përmbyset vetëm me anë të një lufte të armatosur kundër saj dhe kjo luftë e armatosur duhet të fillojë në Kosovë dhe Metohi, ku është më e lehtë ta nxisësh popullsinë kundër klikës së Titos”. Për Çuvahinin kjo do të thoshte se Shehu ishte në favor të bashkimit të Kosovës me Shqipërinë, dhe ai thekson:



Me anë të kësaj, M. SH. (Mehmet Shehu) më la të kuptoja se për popullsinë shqiptare të Kosovës dhe të Metohisë çështja nëse rajoni duhet të bashkohet ose jo me Shqipërinë është e vendosur, domethënë, K dhe M duhet të bashkohen me çdo kusht me Shqipërinë. Çështja e vetme që shtrohet është se kur do të jetë më e përshtatshme të angazhohemi me këtë slogan ndër popullatën shqiptare të K dhe M: pas fundit të luftës me klikën e Titos apo gjatë rrjedhës së luftës…



Në këtë atmosferë, Hoxha filloi të organizonte infiltrimin e Kosovës me militantë të trajnuar, të cilët kishin si detyrë krijimin e celulave të fshehta të “spiunëve të fjetur” për të qenë gati për të luftuar kundër kontrollit të Beogradit në të ardhmen afatgjatë dhe për të siguruar informata sekrete për Tiranën dhe Moskën në planin afatshkurtër. Shpesh, këto rezultuan në objektiva kontradiktorë….. Me kalimin e viteve ’50 pati një ndryshim të theksit, me prioritetet e spiunazhit të Tiranës për llogari të Moskës që po i prishnin të gjitha përpjekjet për të ndërtuar një ushtri të rezistencës. Megjithatë, ideali i një ushtrie kosovare nuk u shua asnjëherë. Gjyqi i vitit 1956 për spiunazh në Prishtinë hyn në këtë paradigmë, edhe pse është e dyshimtë nëse Noel Malcolm ka të drejtë kur thotë se kishte pak prova për aktivitet hoxhist në këtë ngjarje.



Si stërviteshin rekrutët kosovarë në Akademinë e Mbrojtjes të Tiranës



Kosova po fillonte të shfaqej në axhendën politike në Tiranë pas vdekjes së Enver Hoxhës në vitin 1985. Pasuesi i këtij, Ramiz Alia, kishte qenë një komisar politik i ri në Kosovë për një kohë të shkurtër gjatë Luftës së Dytë Botërore dhe, edhe pse ai në atë kohë kishte një histori të dobët bashkëpunimi politik me partizanët jugosllavë, të paktën kishte njohuri personale praktike për Kosovën dhe interes për kushtet e Kosovës, ndryshe nga pjesa më e madhe e lidershipit komunist të Tiranës. Zhvillimet në partinë jugosllave po shikoheshin me shqetësim të rritur ndërkombëtar, edhe pse në këtë faze ka shumë mundësi që vetëm shërbimi sekret amerikan ishte i vetëdijshëm për kërcënimin e marrjes nga Millosheviçi të pushtetit të të gjithë aparatit të partisë. Ka gjasa që në këtë periudhë filluan të krijoheshin disa lidhje joformale mes shërbimit sekret të Tiranës, i cili ishte i lirë të udhëtonte për në Zvicër, për shkak se shumica e financave dhe e pagesave të tregtisë me jashtë kryhej atje, dhe lidershipit të LPK-së brenda dhe përreth Cyrihut dhe Gjenevës. Një pjesë e mirë e këtij biznesi ishte tashmë në duart e agjentëve të Sigurimit dhe praktikisht nën kontrollin personal të R. Alisë. Alia pretendon se ai parashikoi mundësinë e një situate të re revolucionare në Kosovë dhe ai sigurisht që duhet të marrë një pjesë të meritës për lejimin e trajnimit të parë ushtarak për kosovarët në Akademinë e Mbrojtjes të Tiranës për një periudhë trevjeçare. Është gjithashtu krejtësisht e qartë se Alia e konsideronte Ushtrinë Republikane Irlandeze (IRA) si një model të mundshëm për një ushtri kryengritëse kosovare….



Kur interesimi I tij iu bë i njohur qeverive perëndimore, përmes spiunëve të tyre në Tiranë, ata u shqetësuan se mos së shpejti lindte një “Shqipëri e Madhe”, nëse mes Tiranës e Prishtinës hiqeshin pengesat e vjetra…. LPK-ja dhe kosovarë të tjerë radikalë kishin pasur gjithnjë kontakte me ushtrinë shqiptare në kufi dhe me qeverinë shqiptare përmes shërbimit sekret, Sigurimit. Me përmbysjen e komunizmit, shërbimet sekrete perëndimore u infiltruan në një shkallë të gjerë brenda Sigurimit. Si president i Shqipërisë, Ramiz Alia kishte takuar në Tiranë liderët e LPK-së, Xhavit Halitin, Xhavit Hazirin dhe Ahmet Haxhiun, pak kohë përpara se të humbte pushtetin në vitin 1991. Ky ishte një takim i hapur, për të cilin agjentët e shërbimeve sekrete perëndimore në Tiranë do të informoheshin së shpejti. Alia kishte premtuar ndihmë morale për liderët e LPK-së, por është e qartë se mbështetësit perëndimorë të kundërshtarit të tij politik, Sali Berisha, mund ta kenë kuptuar se së shpejti kjo mund të pasohej nga ndihma materiale dhe ky ishte një veprim më shumë që do të përshpejtonte fundin politik të Ramiz Alisë. Është e paqartë se deri në ç’pikë premtoi të shkonte Alia në ndihmë të kosovarëve… Në fund të pranverës së vitit 1990, me miratimin dhe dijeninë e qeverisë së Tiranës, fermeri i Prekazit, Adem Jashari, drejtoi një grup rekrutësh nëpër pyjet e dendura mbi Qafën e Koshares për në Shqipëri, për të filluar stërvitjen në Akademinë Ushtarake në Tiranë dhe në kampet ushtarake vendase në kodrat shqiptare. Shërbimi sekret jugosllav duhet të ketë pasur njëfarë ideje për atë që po ndodhte, përmes rrjeteve të tij informuese dhe, në 30 dhjetor të vitit 1990, fshati i tij i Prekazit u rrethua nga automjete të ushtrisë dhe të policisë dhe nga helikopterë që fluturonin ulët mbi shtëpitë e fermerëve. Kjo do të ishte një provë për ngjarjet dramatike që do të ndodhnin tetë vjet më vonë, në mars të vitit 1998, kur ai vdiq aty… Në qeverinë e Berishës, pas vitit 1992, pasuan grupe të tjera (gjithnjë të përbëra nga dhjetë veta), siç ishin, për shembull, rekrutët e çuar në Shqipëri në vitin 1993. Edhe pse tashmë këto trajnime ishin shpallur si ilegale nga qeveria ‘Berisha’, në praktikë ishte bërë pak ose aspak për t’i ndaluar…



James Pettifer është profesor i Historisë ballkanike në Universitetin e Oksfordit. Ai është autor i disa veprave kryesore për Ballkanin e Jugut, Greqinë dhe Turqinë, ndër to “Shqipëria, nga anarkia tek identiteti ballkanik”, “Çështja e re e Maqedonisë”, “Krijimi i krizës greke” dhe “Ekspresi i Kosovës”./express/[/quoteem]
You do not have the required permissions to view the files attached to this post.
Jam fisnike e kam zemren gure,
si Shqiponja ne flamure.
Mburrem dhe jam krenare,
qe kam lindur Shqiptare.
Nga do qe te jem me ndjek fati,
se jam Shqiptare, shkurt hesapi !!



User avatar
rrëqebull
Grand Star Member
Grand Star Member
Posts: 1158
Joined: Sat Oct 06, 2012 12:29 pm
Gender: Male

Re: James Pettifer: Diktatori Enver Hoxha i formoi celulat e para të UÇK-së

#2

Post by rrëqebull » Mon Apr 13, 2015 7:44 pm

Adriana wrote:Dikush a mundet te me thote sa % te vertet ka ne kete 'zbulim' ??
Zero-me-xhufkë%.

Interpretime të sforcuara pa asnjë themel, por që shërbejnë si prapavijë për përçimin e qëllimeve të caktuara politike.

Disa vendeve të huaja, të ashtuquajturve "fitues" të L2B, u intereson pastrimi i figurës së Enver Hoxhës (nëpërmjet kësi "studimesh" me pohime të bëra në tym, e me interpretime që mund të quhen të tilla veçse si eufemizëm për shpifjet, ku agjenda politike nën reshta «ia bën mu»), sepse duan që të pastrojnë vetveten.

Çkomunistizím i Shqipërisë, dhe dalje në dritë e të vërtetave të nacional-shkatërrimtarëve, do të thotë edhe dalje në shesh «e lakrave» të "aleatëve" (që sot thirren me emrin tjetër, ndonëse të ngjashëm, "partnerë ndërkombëtarë"). Kështu shpjegohet e gjithë kjo lëvritje kundra-historike me objektivitet selektiv nga ana e tyre. (Objektivitet selektiv domethënë që, sipas shtetit të Siujdhesës Ilire që duan të sulmojnë, bëjnë pohime gjoja 'dashamirëse' për shtetin kundërshtar të atij historinë e të cilit duan të dekonstruktojnë. Për shëmbull, kur Miranda Vikersi ka shkruar për Çamërinë me objektivitet, duhet kuptuar se synimin që ka patur ka qenë që të sulmojë Greqinë, dhe jo e vërteta në vetvete.
Prandaj duhet të qëndrojmë të kthjellët dhe të mos hutohemi kur shqyrtojmë shkrimet e internacionalistëve, kundrashqiptarëve me agjendë të paracaktuar politike).
rrëqebull wrote:Edhe mua më ka befasuar ky artikull(dhe të gjithë ata që Vikers-ia ka shkruajt për Çamërinë), për saktësinë e kritikave që parashtron, mbasi kisha lexuar një pjesë nga libri “Terrorizmi historiografik” i Kastriot Myftarajt me titull Pse hesht Ismail Kadare për librin e Natali Klejer, ku ndër të tjerash thuhet:
Menjëherë pas rënies së regjimit komunist në Shqipëri, në vitin 1993, në Paris u bë një takim ku morën pjesë disa të ashtuquajtur studiues të çështjeve shqiptare, që tashmë përbëjnë celulën e doktorëve-vrasës të terrorizmit historiografik antishqiptar. Në këtë takim qenë të pranishëm Nathalie Clayer, Alexandre Popoviç, Bernd Fischer, Peter Bartl, Oliver Schmitt, Miranda Vickers, James Pettifer, Stephanie Schwandner-Sievers.
Gjithashtu qenë të pranishëm edhe leitnantët e tyre shqiptarë Fatos Lubonja, Piro Misha, Aurel Plasari, Remzi Lani etj.

E gjithë pjesa: https://vargmal.org/dan5271#post16026

User avatar
rrëqebull
Grand Star Member
Grand Star Member
Posts: 1158
Joined: Sat Oct 06, 2012 12:29 pm
Gender: Male

Re: James Pettifer: Diktatori Enver Hoxha i formoi celulat e para të UÇK-së

#3

Post by rrëqebull » Mon Apr 13, 2015 8:52 pm

Objektiviteti selektiv në artikullin e mësipërm gjendet për shembull tek këto rreshta:
“Por duhet thënë se historia bashkëkohore nuk ka qenë një fushë e lehtë në gjeneratën e fundit në Beograd dhe ende vazhdon të jetë e tillë edhe pas rënies së regjimit të Millosheviçit. Shumë nga rrëfimet e serbëve për luftën dhe për çështje të lidhura me të bazohen në mohimin e shumë të vërtetave themelore dhe përmbajnë, sipas mendimit tim, shumë gabime të thella në dhënien e fakteve dhe në interpretimin e tyre”
Ndërlikimi i kësaj çështjeje shkaktohet nga fakti që, kur 'historianët' me qëllime kripto-politike kundra-nacionaliste merren me "dekonstruktimin" (zbërthimin) e miteve historiografike serbo-greke — duke qenë se mitet e "nacionalizmave" të këtyre janë përnjëmend shtrembërime, përvetësime dhe gënjeshtra të sajuara nga akademitë e tyre shtetërore e kishtare — ata nuk gabojnë.

Problemi fillon kur të njëjtën metodë duan ta përdorin për të "dekonstruktuar" 'mitet' e Nacionalizmit Shqiptar, pasi ky i fundit është i themeluar në vërtetësi dhe natyrshmëri, ka buruar nga vet Kombi Ynë dhe nuk është sajuar e përpunuar nga asnjë lloj akademie, thjesht është mbledhur, pohuar, jehuar, ushqyer e rigjallëruar nga Rilindësit Tanë. [Për të marrë si shembull pikërisht një ndër dështimet "dekonstiktive" të 'terroristit historiografik' Oliver Shmit: që Gjergj Kastrioti është Heroi Ynë Kombëtar nuk është se e kemi mësuar në shkollë apo se na e ngulitën në mendje Rilindësit Tanë, por kujtesa e Tij ka qenë përherë e gjallë dhe është trashëguar vetvetiu në çdo familje shqiptare, në çdo fshat, qytet e krahinë shqiptare (mjafton të përmendet fakti që kudo nëpër Trevat Tona gjenden vende me emrin e Tij: `Gjurmët e Kalit të Skanderbegut`, `Guri i Skanderbegut`, `Kroi i Skanderbegut`, `Gurra e Skënderbeut` eshtj.].

Dhe fakti që disa intelektualucë vihen në shërbim të neobolshevizmit e interancionalizmit postmodernist me "studimet" e "hartimet" e tyre, duke e shpërfillur tërësisht dallimin e lartparaqitur, tregon që:
˗ ose nuk e kuptojnë një gjë kaq të thjeshtë ngase nuk kanë as thellësinë botëkuptimore e as njohuritë më fillestare për ato çka flasin;
˗ ose veprojnë me dashaligësi e rrogëtarizëm sepse as nuk bëjnë pjesë farë (ose nuk ndihen në lartësinë e duhur për të bërë pjesë) në Shqiptarí;
˗ ose veprojnë me mendjelehtësi, hedonizëm dhe majmunizëm për t'u ndjerë "të emancipuar", "perëndimorë", "si bota", "jo-provincialë", "mendje-hapur" a çkado kategori tjetër honxhobonxhosh të cilët i gënjen mendja se mund të jesh 'i emancipuar' edhe atëherë kur nuk je më vetvetja.

User avatar
Adriana
Universe Member
Universe Member
Posts: 3191
Joined: Tue Jun 02, 2009 3:34 pm
Gender: Female
Location: Giethoorn (Nederland)
Contact:

Re: James Pettifer: Diktatori Enver Hoxha i formoi celulat e para të UÇK-së

#4

Post by Adriana » Tue Apr 14, 2015 2:12 pm

rrëqebull wrote:
Adriana wrote:Dikush a mundet te me thote sa % te vertet ka ne kete 'zbulim' ??
Zero-me-xhufkë%.


Faleminderit Rrëqebull
Jam fisnike e kam zemren gure,
si Shqiponja ne flamure.
Mburrem dhe jam krenare,
qe kam lindur Shqiptare.
Nga do qe te jem me ndjek fati,
se jam Shqiptare, shkurt hesapi !!



User avatar
rrëqebull
Grand Star Member
Grand Star Member
Posts: 1158
Joined: Sat Oct 06, 2012 12:29 pm
Gender: Male

Re: James Pettifer: Diktatori Enver Hoxha i formoi celulat e para të UÇK-së

#5

Post by rrëqebull » Tue Apr 14, 2015 9:28 pm

Adriana wrote:
rrëqebull wrote:
Adriana wrote:Dikush a mundet te me thote sa % te vertet ka ne kete 'zbulim' ??
Zero-me-xhufkë%.


Faleminderit Rrëqebull
Asgjë.
***
Gjithnjë nga artikulli i mësipërm:
Është e paqartë se deri në ç’pikë premtoi të shkonte Alia në ndihmë të kosovarëve…
Jo, është krejt e qartë që artikulli i mësipërm (ndër të tjera Adem Jasharin e quan «fermeri i Prekazit») është i ndërtuar veçse duke shukur me pahir së bashku hamendësime, gjysëmpohime, "interpretime të lira", krahasime të papërkueshme, aluzione tymosëse dhe pseudo-fakte (të pambështetura asgjëkundi, të pavërtetueshme ose lehtësisht të fallsifikueshme).

Për të kuptuar qëndrimin e njëmendtë të Ramiz Alisë ndaj Shqipërisë Veriore, duhen pasur parasysh ngjarjet e korrikut 1990 dhe pyetjet e shtruara nga minuta 31:10 e këtij dokumentari :
Po përse PPSH-ja vendosi të luante kartën e fortë? Përse për më shumë se pesë ditë të tjera emigrantët u ndaluan që të largohen për në vendet ku ata qenë nisur?

Përgjigja e kësaj pyetjeje s'ka qenë e lehtë dhe s'ka marrë përgjigje ende sot, njëzet vjet më pas;
si dhe shumë pyetje të tjera që përbëjnë trupin misterioz të historisë së shtetit shqiptar.

Kush dha urdhër për të qëlluar mbi protestuesit më 2 korrik?

Kush dha urdhër për hapjen e Ambasadave nga data 3 deri më 5 korrik 1990 dhe kush më pas urdhëroi mbylljen hermetike të tyre?

A kishte një lidhje mes ngjarjeve të 2 korrikut në Tiranë dhe atyre në Prishtinë, ku thuajse në të njëjtën orë, Kuvendi i Kosovës e shpalli atë Republikë?

A sfumoi kriza e emigrantëve në Shqipëri vëmendjen normale që duhej të kish marrë Kosova?


Askush s'është përgjigjur për këto dhe sa herë dikush ka tentuar t'i japë përgjigje, portat hermetike të arkivave dhe kujtesa njerëzore e atyre që kanë qenë regjisorë të të gjithë kësaj, ka qenë e mbyllur!
Image

Post Reply

Return to “Artikulli i ditës”