Ja edhe raporti, per ata qe duan te dine me ne hollesi se c'lloj informatash fut ambasada greke aty:
Mediat shqiptare monitorohen dhe analizohen në mënyrë konstante nga Athina zyrtare lidhur me mënyrën se si i trajtojnë çështjet që kanë të bëjnë me Greqinë, minoritetin etnik grek, Kryepeshkopin Anastas, por edhe për të ashtuquajturin Vorio-Epir. Për herë të parë "Gazeta Shqiptare" arrin të faktojë se si nëpërmjet ambasadës greke në Tiranë hartohen periodikisht raporte për mediat shqiptare, që i përcillen mandej Ministrisë së Shtypit në Athinë. Ekskluzivisht, një prej këtyre raporteve është siguruar dje nga GSH. Ai është përpiluar në datën 1 qershor 2007 dhe ka mbi dosje numrin 50. Përgatitës të tij janë ekspertët e ministrisë, Jorgo Vlahos dhe Avra Gregoriou, të cilët analizojnë imtësisht të gjitha shkrimet, komentet apo kronikat televizive, që sipas tyre ndikojnë në rritjen e frymës anti-greke në Shqipëri. Në këtë raport përmenden me emra konkretë se cilat janë të përditshmet, televizionet, gazetarët, historianët dhe politikanët që shprehin qëndrime kritike ndaj disa prej politikave greke që ndiqen në Shqipëri.
HYRJE
PO RRITET FRYMA ANTI-GREKE
Në mënyrë të çuditshme dhe ndoshta të koordinuar, në shtypin shqiptar të ditëve të fundit janë botuar artikuj me frymë anti-greke, në prag të vizitës së shkurtër të Bushit në Tiranë, në datën 10 qershor. Janë bërë sulme ndaj Kryepeshkopit Anastas deri dhe janë botuar pasaktësi historike për të mohuar prejardhjen greke të Vorio-Epirit. Të gjitha këto kanë ndodhur gjatë kësaj kohe që opozita po kërkon nga Berisha zgjedhje të parakohshme, si edhe zgjedhjen me konsensus të Presidentit të Republikës.
PËRGJEGJËSIT:
Jorgo Vlahos
Avra Gregoriou
* * *
RAPORTI
E PREMTE, 1 QERSHOR 2007
NUMRI I DOSJES: 50
MOHOJNË
PREJARDHJEN GREKE TË
VORIO-EPIRIT
Gazeta "METROPOL" ka pranuar të publikojë një shkrim të gjatë të shqiptarit Arsim Spahiu, profesor i historisë në universitetin 'Franche-Comte', i cili përpiqet të provojë, madje me "argumente historikë", "ilirizimin" domethënë karakterin shqiptar të Epirit dhe sidomos të Epirit të Veriut. Gjatë tre dhjetëvjeçarëve të fundit, shkruan Spahiu, disa historianë anglo-amerikanë, njësoj si historianët dhe gjuhëtarët austriakë e gjermanë të shekujve të mëparshëm, janë ngritur kundër mënyrës së trajtimit të problemit të Vorio-Epirit nga historianët grekë dhe të huaj, "helenofilë". Epirotasit, sipas Spahiut, ishin pellazgo-ilirë. Shqiptarët e sotëm edhe pse nuk e shkruajnë gjuhën e tyre, vazhdon Spahiu, gjuhëtarët kanë bërë përparime në studimet e tyre që vërtetojnë lidhjen mes gjuhës iliro-epirote dhe shqipes së sotme. Toponimet si Vlora, lumenjtë Vjosa dhe Aos apo lumi Thyamis nga e ka marrë emrin Çamëria, sipas Spahiu, vërtetojnë identitetin ilir të Epirit. Në shtypit shqiptar, së fundmi po shohin dritën e botimit disa studime historike, që përpiqen të provojnë me "argumente shkencore" se Epiri dhe në veçanti Epiri i Veriut historikisht kanë qenë troje iliro-shqiptare, pra që grekërit nuk janë vendas.
AVOKATËT GREKË NË TREGTINË E LEJEVE TË QËNDRIMIT
Policia shqiptare, sipas së përditshmes "PANORAMA", dyshon se disa avokatë grekë, për një shumë 2.500-3000 euro, japin leje qëndrimi false në Greqi për emigrantët. Viktimat e këtyre avokatëve, vazhdon gazeta, ka të ngjarë të kenë rënë dhjetëra emigrantë shqiptarë. Policia shqiptare në muajt e fundit, gjatë kontrollove të kujdesshme, ka arrestuar dhjetëra emigrantë shqiptarë që vijnë nga Greqia, të cilët kanë leje qëndrimi false. Policia e aeroportit të Rinasit në Tiranë, arrestoi qytetarin shqiptar, 52-vjeçarin Gëzim Karaji, i cili dispononte leje qëndrimi për në Greqi false. Emigranti pretendoi se lejen e kishte marrë nga një zyrë ligjore në Athinë për 3 mijë euro, në të cilën kishin marrë leje qëndrimi edhe emigrantë të tjerë.
"PRESION BERISHËS PËR MINORITETIN"
Është titulli i madh që i përgjigjet dy faqeve të "GAZETA SHQIPTARE", për nevojën e një numri të caktuar vendesh në parlamentin shqiptar për pakicat që jetojnë në vend. Gazetarja, Gilmana Bushati, nënvizon në komentin e saj se para përgatitjes së reformës zgjedhore, kryeministri Berisha duhet të ketë parasysh rekomandimet për përfaqësimin e minoritetit në Parlamentin shqiptar, që janë bërë nga Partitë Popullore Europiane, ku Nea Demokracia e z.Karamanlis, luan një rol të rëndësishëm. Interesi i Greqisë që minoriteti grek të përfaqësohet në Parlamentin shqiptar, vazhdon gazeta, është në kuadër të respektimit të të drejtave të njeriut dhe minoriteteve, të cilat janë një nga kushtet për integrimin e Shqipërisë në Europë. Në respekt të këtyre rekomandimeve, vazhdon gazeta, Berisha bëri deklaratën e tij të famshme në Parlament për një numër të caktuar vendesh për minoritetin në Kuvend. Më pas në gazetë shkruhet se Greqia është më shumë e interesuar për Shqipërinë qendrore dhe jugore, sepse PBDNJ nuk ka votues të saj në Veri. Minoriteti grek që nga viti 1991, sipas gazetës, është përfaqësuar gjithmonë në parlamentin shqiptar me 2 ose 4 deputetë.
OPOZITA
KUNDËRSHTON LIGJIN PËR PROGRAMET DIXHITALE
Partitë e opozitës, gati të gjitha të bashkuara, me liderin e tyre, kundërshtuan miratimin nga Parlamenti të ligjit për programet dixhitale. Kryetari i Partisë Socialiste, Edi Rama, e cilësoi miratimin e ligjit si një akt të turpshëm të qeverisë që injoron rekomandimet e Bashkimit Europian dhe dëmton përpjekjet për dialog dhe konsensus. Kryetari i Lëvizjes Socialiste për Integrim, Ilir Meta, e akuzoi mes të tjerash Berishën për shkelje të lirisë së shtypit. Gjithashtu edhe kryetari i Aleancës Demokratike, Neritan Ceka e akuzoi Berishën se ka mentalitet komunist dhe se po lufton kundër kanalit privat "Top Channel", për arsye krejtësisht personale. Vetë "TOP CHANNEL" e fajësoi Berishën se po i ushtron presion dhe e krahasoi me Presidentin e Venezuelës, Hugo Çavez. "TOP CHANNEL" njoftoi se do të shtonte numrin e kanaleve në gjuhën shqipe përmes sistemit satelitor dhe së fundmi akuzoi Berishën se është përpjekur për ta blerë, dhe pasi dështoi, i deklaroi këtij kanali luftë të hapur.
SULME MBI ANASTASIN NGA NJË PARTI QEVERISËSE
Gazeta "REPUBLIKA" e Partisë Republikane që merr pjesë në koalicionin qeverisës, ka botuar një artikull të shkruar nga Ahmet Çaushi, i cili është Kryetari i Këshillit të Përgjithshëm të Bashkësisë Islame në Shqipëri. Në artikullin e tij, Çaushi kundërshton Kryepeshkopin, i cili në një intervistë të dhënë për "Deutsche Welle" ka thënë se komunitetit mysliman dhe katolik në Shqipëri ka më shumë klerikë të huaj në krahasim me komunitetin ortodoks. Çaushi në krahasim me të dhënat e raportuara nga Kryepeshkopi në intervistën e tij mbi përbërjen fetare të popullsisë në Shqipëri thotë se në Shqipëri, 80% e popullsisë është e besimit mysliman. Pastaj, Çaushi akuzon Greqinë se "detyron emigrantët shqiptarë për të ndryshuar emrin dhe fenë e tyre" dhe shton se "emigrantët në Greqi mbajnë në zemrat e tyre nacionalitetin shqiptar dhe besimin Islam".
REAGIM NDAJ RAPORTAZHIT ANTI-GREK TË NJË SHKOLLE
Drejtoria Arsimore Rajonale e Korçës, me anë të një deklarate, i cilësoi shpifje pretendimet e "GAZETA SHQIPTARE" se në shkollën private "Omiros" mësohet një tekst historie me përmbajtje anti-shqiptare. "Vetëm dy vjet pas hapjes së shkollës 'Omiros' nxënësit më të vjetër të saj janë në klasën e tretë të shkollës fillore. Sipas programit zyrtar të Ministrisë shqiptare të Arsimit, e cila është e detyrueshme në të gjitha shkollat publike dhe private në vend, lënda e historisë fillon të mësohet në klasën e katërt në shkollën fillore. Pra në shkollën 'Omiros' nuk mësohet lënda e historisë", thuhet në njoftimin e Drejtorisë Arsimore Rajonale të Korçës. Në reportazhin e tij, gazetari i së përditshmes, Tedi Blushi thotë se nxënësit e shkollës 'Omiros' mësojnë në lëndën e historisë për mitet dhe për luftëtarët grekë dhe se e njohin shumë mirë gjuhën greke. Blushi i ka thënë këto edhe për kamerën e stacionit televiziv "NEWS 24" (GAZETA SHQIPTARE dhe NEWS 24 i përkasin një grupi mediatik). Nga Shqipëria, vazhdon Blushi, ata (nxënësit) njohin vetëm Skënderbeun. "Në shkollën 'Omiros' është bërë një inspektim rreth dy muaj më parë dhe nuk është konstatuar as edhe një parregullsi. Nga kontrolli është konstatuar se në këtë shkollë nuk këndohet himni grek", thuhet në njoftimin e Drejtorisë Arsimore Rajonale të Korçës. Megjithatë nxënësit e shkollës, vazhdon Blushi, kënduan për kameran e "NEËS 24" himnin grek, të cilin thanë se e kishin mësuar në shkollë.
BERISHA:
PRESIDENTIN TA
ZGJEDHIM ME
KONSENSUS
Kryeministri Berisha tha në mbledhjen e qeverisë, se ai është i gatshëm që të angazhohet në konsultime dhe negociata me opozitën për zgjedhjen me konsensus të Presidentit të Republikës. Sipas Berishës, "duhet të gjendet një zgjidhje që të jetë e pranueshme për të dyja palët". Gjithashtu, kryeministri shqiptar theksoi se "zgjedhja e presidentit të ri nuk duhet të shndërrohet në një krizë politike në vend, sepse një krizë e tillë do të kishte pasoja shumë negative në përpjekjet e Shqipërisë për integrimin në strukturat euro-atlantike". Berisha ftoi opozitën për të bashkëpunuar me qeverinë për zgjedhjen konsensuale të Presidentit të Republikës, duke theksuar se "shpresoj që opozita të mbajë premtimin e saj për të zgjedhur Presidentin me konsensus". Nga ana tjetër, sekretari organizativ i Partisë Socialiste, Bashkim Fino tha se "vetëm pas vizitës në Bruksel, kryeministri Berisha deklaroi për herë të parë se është në favor të zgjedhjes me konsensus të Presidentit të Republikës, ndërsa për këtë PS-ja është shprehur shumë më herët". Sipas Finos "tani është hapur drita jeshile për zgjedhjen e Presidentit të ri dhe të gjithë duhet të jemi dakord për zgjedhjen e tij me konsensus".
* * *
Gazeta "SHEKULLI" thotë se zgjedhja e Presidentit të ri ka shkaktuar përçarje brenda shumicës qeverisëse, duke vënë në dukje se partitë e vogla janë kundër kandidaturës së Bamir Topit dhe se po sugjerojnë emra të tjerë. Nga ana e saj, gazeta "SHQIP" thotë se nënkryetari i partisë në pushtet, Bamir Topi, pas një vizite në Greqi u takua me prefektin e Gjirokastrës, Spiro Ksera. Gazeta thotë se duke marrë parasysh se Ksera i përket PBDNJ-së, Bamir Topi po përpiqet të lobojë me PBDNJ-në për të siguruar votat në parlament për t'u zgjedhur President i Republikës.
* * *
Kreu i Partisë Socialdemokrate, Skënder Gjinushi, në një takim me strukturat organizative të partisë shprehu mospajtim me qëndrimin e partive të tjera të majta për zgjedhjen e Presidentit të Republikës. Ndërkohë që Partia Socialiste dhe partitë e tjera të majta shprehin gatishmërinë e tyre për zgjedhjen me konsensus të Presidentit të Republikës, Gjinushi thotë se "jo zgjedhja e Presidentit por zgjedhjet e parakohshme janë zgjidhja më e mirë për Shqipërinë". Sipas Gjinushit, Shqipëria ndodhet në një krizë të thellë për shkak të keqqeverisjes dhe se zgjedhja, qoftë edhe me konsensus e Presidentit të Republikës, nuk mund ta zgjidhë krizën.
ARMËT ME
DESTINACION
GREQINË
Mediat shqiptare bëjnë të ditur se policia shqiptare ka arrestuar një emigrant shqiptar, Alban Gjoci, në makinën e të cilit janë gjetur një automatik, pesë pistoleta, shtatë granata dhe katër kuti me 3 mijë plumba kallashnikovi. Shtypi njofton se i riu Alban Gjoni, i cili është emigrant në Greqi, ishte kthyer në Shqipëri para 10 ditësh dhe me 6 mijë euro kishte blerë në Shkodër armët që iu kapën nga policia. Me shitjen e tyre në Greqi, shkruan "GAZETA SHQIPTARE", emigranti shqiptar do të fitonte më shumë të holla sesa ato që kishte shpenzuar për blerjen e tyre në tregun e zi të qytetit.
Plus nuk e dija une qe vetem Eladha i paska perfekt te gjithe njerezit ne sjellje..... 
pse behesh qesharak!
