Gjendja ne veri te Kosoves.

[Adriana]

Dhimbje dhe krenari për kolegun Enver Zymberi


Pikat u morën pas 12 vjetësh nën kontroll nga shteti i Kosovës, por policia mbeti pa njërin prej djemve më të mirë të saj, Enver Zymberi. Pos krenarisë, të dy policët i bashkon dhimbja për kolegun e vrarë, tashmë i shpallur edhe hero. “Ndiejmë dhimbje për kolegun e vrarë në detyrë, Enver Zymberi, por edhe krenarë për shëmbëlltyrën e tij. Familjes së Enverit i shprehim ngushëllime më të thella. Dhimbjen për Enverin e kemi kthyer në krenari dhe objektivin e tij do ta realizojmë në tërësi në praktikë”, sikur betohet njëri nga policët.

Ata nuk i zmbraps humbja e kolegut, madje shprehen të gatshëm që në çdo çast të jenë aty ku i kërkon Kosova.

[Adriana]

Rrëfimi i dy pjesëtarëve të Njësisë Speciale të Kosovës


Të prekur thellë në shpirt për humbjen e kolegut të tyre Enver Zymberi, por krenarë që kanë qenë pjesë e operacionit policor për vendosjen e ligjshmërisë dhe zbatimin e reciprocitetit edhe në pikat kufitare në Bërnjak e Jarinjë, dy pjesëtarë të njësive elite të Policisë së Kosovës, tregojnë në detaje për ndërhyrjen në pjesën veriore.


Ata në kushte anonimiteti kanë ndarë me lexuesit e “Epokës së re” çastet më emocionuese dhe sfiduese të kësaj ndërhyrje.

Njëri në mbrojtje të Jarinjës, tjetri të Bërnjakut, të panjohur për njëri-tjetrin, ndihen të privilegjuar që kanë qenë pjesë e një aksioni vendimtar për shtetin. Përveç uniformës, ata i lidh edhe kauza e përbashkët: mbrojtja e kufijve të Republikës së Kosovës.

Nisja për në veri

Ka mjaftuar një telefonatë, që secili prej pjesëtarëve të elitës së policisë ta veshë uniformën blu dhe të niset për në detyrë, pa ditur saktësisht se për çfarë plani operacional po bëhet fjalë. “Më 25 korrik rreth orës 20:00 nga Drejtoria e Përgjithshme e Policisë së Kosovës është dhënë urdhri për përgatitjen e njësive speciale”, tregon polici i parë.

Ai thotë se përshtypja e parë e policëve ka qenë se po bëhet fjalë vetëm për ndonjë ushtrim. “Fillimisht kemi menduar se është vetëm një ushtrim për ta matur kohën e reagimit dhe për ta testuar gatishmërinë tonë. Ne bëjmë shpesh ushtrime të tilla dhe përshtypja jonë ka qenë se është thjesht një ushtrim i radhës”, tregon ai.

Pas këtij urdhri ai kujton se rreth orës 21 e 30 kanë arritur në bazën e Mitrovicës, ku është mbajtur një takim informues nga eprorët më të lartë të Drejtorisë së Përgjithshme të Policisë së Kosovës. “Kur na thanë të pajisemi me të gjitha mjetet, blindat, helmetat armët e gjata dhe të gjitha pajisjet e tjera, për një aksion me rrezikshmëri të lartë, kuptuam se kemi të bëjmë me një operacion shumë të rëndësishëm.

Por, na njoftuan vetë pas pak. Urdhri ka qenë se duhet të shkojmë ta zbatojmë vendimin e Qeverisë për vendosjen e ligjshmërisë në pikat kufitare 1 dhe 31 dhe zbatimin e masave të reciprocitetit”, tregon ai. Më pas, ai thotë se çdonjëri prej policëve me vendosmëri të lartë është bërë gati për nisjen e aksionit. “Eprorët tanë na kanë pyetur se a jemi të gatshëm të shkojmë për aksion, mos jemi ndonjëri sëmurë apo ka ndonjë hezitim për veprim operativ, por askush nuk kundërshtoi. Përkundrazi, te të gjithë vëreheshin kënaqësia dhe gatishmëria për veprim të menjëhershëm”, tregon polici, duke shtuar se ka qenë edhe vetë i ngazëllyer me reagimin e kolegëve.

Ai tregon se janë ndarë në dy grupe, njëri për Jarinjë e tjetri për Bërnjak. “Jemi ndarë në dy grupe, i kemi ndarë detyrat në detaje dhe rreth orës 21 e 45 minuta jemi nisur për në pika. Të gjithë policët kanë treguar gatishmëri për veprim operativ. Gatishmëria e tyre ka qenë 100 për qind. Ne e kemi përgatitur planin që është mbajtur konfident, kemi llogaritur që gjithçka të shkojë mirë dhe të mos kemi humbje”, thotë ai. Por, sipas tij, situata në terren fatkeqësisht ka qenë tjetër.

Ai thotë se motiv të madh elitës së PK-së i ka dhënë qëndrimi i strukturave të larta si nga policia ashtu edhe ato politike nga ministria. “Na ka dhënë edhe më shumë forcë e motivim kur e kemi ditur se pas i kemi kryeministrin Thaçi, ministrin e Brendshëm Rexhepi dhe gjitha strukturat më të larta policore e shtetërore”, rrëfen ai.

Pengesat e para

Pas nisjes ai tregon se shumë shpesh gjatë rrugës kanë takuar qytetarë serbë të mbledhur në grupe, të cilët kanë dashur t’i pengojnë për të arritur te caku. “Gjatë gjithë rrugës kemi takuar qytetarë serbë me vetura me targa serbe, por nuk jemi marrë me ta, e rëndësishme për ne ka qenë arritja e objektivit: vendosja e ligjshmërisë në pikat kufitare”, shprehet ai. Pengesa më e madhe në rrugëtimin e tyre drejt pikës doganore, ai tregon se ka qenë në hyrje në Leposaviq.

“Deri në Leposaviq kemi pasur pengesa të shumta, kurse ajo në hyrje të Leposaviqit ka qenë më e madhja. Për dhjetë deri në pesëmbëdhjetë minuta aty janë grumbulluar rreth 1 mijë qytetarë të cilët qëndronin rreth 30 metra larg nesh”, kujton ai. Nga kjo pozitë policët e Kosovës kanë parë se dritaret e shtëpive serbe përballë rrugës kanë qenë të hapura dhe pranë tyre ka pasur njerëz të armatosur, edhe me snajperë.

“Kur e kemi parë këtë situatë, eprorët tanë në vendngjarje kanë kërkuar sugjerime nga dhoma operative. Pas konsultimit, na është thënë të mos kthehemi mbrapa”, shprehet polici. Serbët, në numër shumë të madh, tregon ai, e kishin bllokuar rrugën me bagerë, kamionë, drunj dhe mjete të tjera të forta. “Fatkeqësisht, ne nuk kemi pasur mjete t’i largojmë këto pengesa. Eprorët kanë biseduar me një prijës të serbëve që nuk dëshironin që ne të shkonim te pika. Problemi tjetër ka qenë se serbët, përveçse të dehur, të cilët kundërmonin alkool, kanë qenë edhe të armatosur”, thotë ai.

Të gjendur në këtë situatë shumë të rëndë dhe të tendosur, që çdo çast ka mundur të shpërthejë, policia ka kërkuar ndihmën e KFOR-it për zhbllokimin e rrugës, së cilës thirrje fillimisht nuk i është përgjigjur. “Kemi qenë në një situatë që nuk mund të ecej përpara. Nga eprorët tanë është kërkuar ndihmë nga KFOR-i që ta largonte bllokadën, por nuk ka ardhur. Kemi mbetur të bllokuar mes Levosaviqit e Rudarit për orë të tëra”, tregon ai.

Derisa policët e Kosovës ishin të rrethuar nga dy anët nga Rudari dhe Leposaviqi, në lokacionin tonë rreth orës 03:00 të natës ka arritur komandanti i KFOR-it, Erhard Buhler, i cili ka biseduar me serbët. “Gjatë kësaj kohe ka pasur bisedime në mes të serbëve të përfaqësuar nga Stefanoviq dhe Bogdanoviq dhe komandantit të KFOR-it, gjeneralit Buhler dhe udhëheqësit të njësive speciale të PK-së”, tregon ai.

Polici thotë se ka pasur kërkesa të tërhiqen, por kryeministri nuk është pajtuar me këtë. “Më vonë, pas një takimi në mes të kryeministrit Thaçi dhe gjeneralit Buhler në një vend në Mitrovicë, të cilët kishin arritur një marrëveshje, që në pikat doganore të dërgoheshin, me ndihmën e KFOR-it, doganierët dhe policia e rendit kufitar, në orët e para të mëngjesit të së mërkurës na është dhënë urdhri që të tërhiqemi”, ka vazhduar tregimin polici.

Por as rruga e kthimit për ta nuk ka qenë e lehtë, pasi në kthim prej Leposaviqit deri në Rudare ishin ballafaquar prapë me ekstremistë serbë.

“Kur kemi arritur në Rudare jemi ndeshur me shumë serbë të revoltuar. Nuk kemi dashur të përdorim forcë për të kaluar në Mitrovicë, por kemi vendosur të përdorim rrugë alternative. Kemi mundur të ndërhyjmë, por pasojat do të ishin shumë të rënda. Kishim forcë ta çanim bllokadën, por nuk ishte në interesin tonë të vritej askush”, thotë ai.

Dhe për ta evituar më të keqen, policia në këtë rast ka përdorur rrugë alternative. “Kemi shfrytëzuar një rrugë malore dhe kemi arritur në Mitrovicë në Drejtorinë Rajonale të PK-së”, tregon ai.

Luftuam ballë për ballë me serbët

Pjesëtari tjetër i Njësisë Speciale të Kosovës ka rrëfyer se si një grup i tyre është sulmuar rrugës për në pikën doganore 31, ku ka rënë polici Enver Zyberi. “Me një grup jemi nisur për të shkuar në pikën 31 për ta ndërruar grupin tjetër, por rrugës kemi hasur në një pritë të organizuar mirë nga ana e serbëve. Rruga ka qenë e bllokuar, kurse nga të dyja anët anësore të rrugës jemi sulmuar. Në atë rast edhe ne jemi kundërpërgjigjur me zjarr për ta mbrojtur veten.

Të gjithë kemi treguar profesionalizëm të lartë, kemi luftuar në afërsi të afërt me serbët e armatosur, nga të cilët dyshohet se ka edhe të vrarë, por fatkeqësisht kemi humbur edhe kolegun tonë Enver Zymberi. Enveri, i cili ndodhej në një automjet të policisë jo të blinduar, është qëlluar nga një snajperist”, tregon ai.

Në bazë të mënyrës se si janë sulmuar dhe armëve që janë përdorur nga bandat e organizuara kriminale , dyshohet se pjesë e serbëve të organizuar kanë qenë edhe njerëz të MUP-it.

Ai në vazhdim thotë se, pasi e kanë njoftuar bazën për gjendjen, kanë marrë një urdhër tjetër për t’u tërhequr nga aty. “Na erdhi urdhri nga baza, se duhet të tërhiqemi dhe u tërhoqëm, edhe pse ishim të përgatitur edhe për situata edhe më të rënda. U tërhoqëm për faktin se objektivi ynë ishte arritur: në pikat kufitare ishin kolegët tanë dhe doganierët e Kosovës”, ka thënë polici.

Përderisa tregon se edhe në terren EULEX-i nuk i ka përkrahur në operacionin e tyre për marrjen e të dy pikave doganore, ai lavdëron KFOR-in për rolin pozitiv që ka luajtur në këtë rast. “Veprimi i KFOR-it është për t’u lavdëruar”, thotë ai.

Dhe si çdo situatë që nxjerr në dritë anët pozitive dhe negative, edhe në këtë rast të dy policët tregojnë se është vërejtur se Njësisë Speciale të Kosovës i nevojiten më shumë mjete të blinduara dhe më shumë armë të gjata e moderne.

[Adriana]

Në veri nuk ka gazeta, bukë dhe as qumësht nga Serbia


Në veri të Mitrovicës të shtunën nuk ka gazeta, bukë dhe qumësht nga Serbia fqinje. Megjithatë këto artikuj janë prezente, por të prodhuesve tjerë, ndërsa akoma nuk vërehet mungesë e artikujve ushqimorë.

Nëpër dyqane buka ka arritur nga furrat e Kollashinit dhe të Rudares.
...
Në veri, nata ka kaluar e qetë, ndërkohë që të dy pikat kufitare kanë qenë të mbyllura për qarkullim edhe për ata që dëshirojnë ta kalojnë kufirin këmbë.

Barrikadat kryesore në Rudare dhe Zupç akoma janë prezente.

[Adriana]

Pika kufitare “njё” tё emërohet pika kufitare “Enver Zymberi”


Partia Nacionale Demokratike Shqiptare propozon qё pika kufitare e Kosovës e njohur si pika kufitare ‘një’ në Jarinjë tё emёrohet pika kufitare “Enver Zymberi”. Konsidrojmë se kjo do të ishte edhe një mirënjohje dhe vlerësim i flijimit kuptimplotë të policit Enver Zymberi i cili me të drejtë nga Presidenca e Kosovës u shpall “Hero i Kosovës”.


Duke i vënë emrin “Enver Zymberi” kësaj pike kufitare ne konsiderojmë se jo vetëm që do ta respektojmë heroin dhe flijimin e tij, por do ta mbajmë pandalshëm, dhe në vendin më të mirë të mundshëm, gjallë dhe aktive përjetësisht porosinë që del nga ky flijim e cila është ruajtja me çdo kusht e çdo pëllumbi të tokës së Kosovës, ruajtja e integritetit dhe sovranitetit të saj, paqes dhe prosperitetit të Kosovës.
Me shpresën se ky propozim do të merret seriozisht në konsideratë nga institucionet përkatëse, shfrytëzojmë nga rasti që edhe një herë t’i shprehim ngushëllimet tona më të sinqerta familjes Zymberi dhe gjithë kolegëve të tij, konkretisht Policisë së Kosovës puna e të cilëve na bëri të ndihemi krenar dhe më të sigurt.

[Adriana]

[Adriana]

[Adriana]

Snajpera serbë dhe mercenarë rusë në veri të Kosovës



KFOR-i nëpërmjet një komunikate të lëshuar ka konfirmuar se në veri ka snajperistë serbë dhe njerëz të armatosur me të cilët ka shprehur vendosmërinë për ballafaqim.

Ndërkohë, në mesin atyre që kanë vënë bllokada në rrugët në Veri të Kosovës nuk ka vetëm pjesëtarë të strukturave paralele, të MUP-it serb dhe shërbimit inteligjent të Serbisë, por edhe terroristë, si dhe mercenarë të ardhur nga Rusia.

“Nëpër bllokada në rrugët në Veri ka njerëz të armatosur të grupit terrorist Garda e Car Llazarit si dhe mercenarë rusë”, kanë thënë të për Express, burime nga Agjencia e Kosovës për Inteligjencë.

Misioni paqeruajtës në Kosovë ka thënë se meqë kishte rrezik nga snajperistët kriminalë dhe rezistencës së armatosur nga elementet radikale të pajisura me pushkë, pistoleta ose eksploziv, një forcë e mjaftueshme e këmbësorisë së blinduar ishte në atë zonë e gatshme, sipas komunikatës, për t’iu përgjigjur në mënyrë të duhur çfarëdo sfide që do të mund të kishte ndodhur.

KFOR-i u bën thirrje të gjithë qytetarëve, siç thotë, paqedashës në Zubin-Potok, që t’u rezistojnë elementeve radikale dhe kriminale dhe të heqin dorë nga dy bllokadat e fundit të rrugëve, të cilat ende pengojnë komunikacionin në qytet.

Misioni i NATO-s vlerëson se situata aktuale në veri të Kosovës është e qetë, por e tensionuar. Ushtarët e KFOR-it janë ende të vendosur në portat kryesore, ku veturat dhe autobusët lejohen që të kalojnë pas kontrollit të detajuar të identifikimit të personave dhe të sigurisë. Automjetet e rënda janë ende të ndaluara për shkak të masave të sigurisë. “Ekziston ende kërcënim që radikalët t’i sulmojnë kalimet kufitare, siç kanë bërë me portën 1 javën e kaluar. Komandanti i KFOR-it pret që qytetarët në të gjitha pjesët e Kosovës të qëndrojnë të qetë dhe paqësorë, si dhe të mbështeten tek masat e ndërmarra nga KFOR-i dhe EULEX-i dhe tek zgjidhjet politike për situatën e tanishme”.

[Adriana]

Christan Schwarz-Schilling kritikon qëndrimin e BE-së ndaj konfliktit kufitar mes Serbisë dhe Kosovës



Serbia përpiqet të dëmtojë pavarësinë e Kosovës dhe i krijon pengesa vetvetes në rrugën drejt BE-së, thotë në intervistë për Radion gjermane "Deutschlandfunk" ish-përfaqësuesi i OKB-së për Bosnje-Hercegovinën.

DLF: Z. Schwarz-Schilling, Ju e kritikoni qëndrimin e BE-së ndaj konfliktit kufitar mes Serbisë dhe Kosovës: Çfarë kuptoni Ju me këtë?

Christian Schwarz-Schilling: Me këtë unë mendoj, se Evropa vet nuk po gjen një gjuhë të qartë kundrejt Serbisë. Nisur nga shmangia e pesë kombeve në Evropë, të cilat nuk e kanë njohur ende pavarësinë e Kosovës, Evropa ngurron dhe veçanërisht ministrja e Jashtme, duke mos gjetur një gjuhë të qartë. Kjo pasi një qëndrim i qartë duhet të mbështetet nga të gjitha kombet.

DLF: Pra kërkesa Juaj e parë do të ishte, që ato vende të BE-së, që ende nuk e kanë njohur Kosovën, duhet ta ndërmarrin menjëherë këtë hap?

Schwarz-Schilling: Unë e kam konsideruar si një gabim shumë të madh, që Komisioni i BE-së, e në radhë të parë BE-ja, nuk ka shprehur një gjykim të qartë menjëherë pas publikimit të dokumentit të Gjykatës Ndërkombëtare lidhur me çështjen e legjitimitetit të shpalljes së pavarësisë së Kosovës. Kjo nuk ka ndodhur. Nëse do të mbahej një qëndrim i qartë, atëherë do të duhej që menjëherë të bisedohej me të pesë vendet dhe të gjendjej një rrugë për tri muajt e ardhshëm, që t'i jepej fund bllokadës së këtyre vendeve ndaj politikës së mëtejshme kundrejt Serbisë.

DLF: A keni Ju ndonjë shpjegim përse nuk ka ndodhur kjo?

Schwarz-Schilling: Kjo është një gjendje normale e Evropës. Nëse diçka nuk është e qartë, atëherë ajo lihet mënjanë. Nëse shihni rastin e Qipros, apo të Bosnjë-Hercegovinës. Një qëndrim i tillë shihet kudo në rastin e Ballkanit, ndaj edhe amerikanët gjithnjë e më shumë po shprehin pakënaqësi, që evropianët nuk janë në gjendje, të vendosin një farë rendi në rajonin e tyre. Sepse sipas kritereve të sistemit të së drejtës, ajo që po ndodh tani është e padrejtë. Kjo ka të bëjë si me bllokadën e doganave, ashtu edhe me situatën, që kosovarët me pasaportat e tyre nuk mund të shkojnë më tutje, por është edhe situata e qarkullimit jo normalisht të mallrave në kufirin serbo-kosovar. Kjo do të thotë, se thjeshtë përmes shkeljeve dhe kundërthënieve nga pala serbe po ndiqen qëllime të qarta, në mënyrë që ku të jetë e mundur të minohet pavarësia e Kosovës. Një shtet të tillë, i cili ndërmerr veprime të tilla - në mënyrë të ngjashme si edhe ndaj Bosnjë-Hercegovinës përmes Republika Srpska - është edhe sot një nxitës trazirash në të gjithë rajonin. Dhe Evropa, duke mos parë asnjë mundësi, për ta penguar këtë, bën sikur në thelb të gjitah mund të zgjidhen vetëm pas bisedimesh të gjata me Kosovën. Në një situatë të tillë, të dyja vendeve u bëhet thirrje -pas një gjykimi si ai në Hagë - të ulen së bashku në tryezën e bisedimeve për ta zgjidhur çështjen. Kjo nuk është metoda e duhur për të ruajtur si objektiv në Evropë shtetin e së drejtës.

DLF: Z. Schwarz-Schilling, Ju folët për gjykimin nga Haga, që ka konstatuar, se në bazë të së drejtës ndërkombëtare pavarësia është legjitime. Nga ana tjetër Ju thoni, se BE-ja preferon më mirë t'i lerë mënjanë gjërat që nuk janë kaq të qarta. Pra sipas mendimit Tuaj a janë shmangur tani të gjitha rezervat, apo jo?

Schwarz-Schilling: Në politikën praktike ato nuk janë shmangur. Serbisë i ngarkohet gjithçka në një drejtim, e kur ajo pas 16 vjetësh pas fatkeqësisë në Srebrenica, Holokaustit, dorëzon zotin Mlladiç, ne i rrahim krahët dhe i themi, shumë mirë, rruga drejt Evropës është kësisoj e shtruar! Këto janë veprime psikologjikisht të pamundura.

DLF: ...Po çfarë mjetesh presioni z. Schwarz-Schilling, ka Bashkimi Evropian? Pra, kur qeveria në Beograd ditët e fundit ka lënë të nënkuptohet, se nuk do të hyjë në marrëveshje të tilla, që do të presupozonin: Njohje e Kosovës në këmbim të statusit të vendit kandidat në BE. A nuk do të duhej në këtë rast që BE-ja të provonte duke e bërë të dështojë pranimin e Serbisë?

Schwarz-Schilling: Kjo nuk mund të ndodhë tani në këtë moment. Përpjekja për të pranuar Serbinë në BE përpara Bosnjes, Kosovës dhe Shqipërisë nuk është realiste, por të nisemi nga struktura e sotme e Serbisë, që ka mjaft mangësi në drejtim të shtetit ligjor, mjafton për këtë të shohësh raportet! Kjo tregon se ne përdorim si busull të politikës më shumë përfytyrimet se sa realitetin dhe faktet. Unë nuk besoj, që parë në plan afatgjatë Serbia do të vazhdojë kështu, nëse i bëhet e qartë, që asaj mund t'i refuzohet pranimi në BE. Megjithëse Tadiç shpeshherë ka thënë, se ai më mirë do të preferonte të hiqte dorë nga antarësimi, se sa të njihte Kosovën. Por një situatë të tillë nuk duhet të importohet në BE!

DLF: Nëse ju kuptoj drejt z. Schwarz-Schilling, Ju fare qartë e shihni përgjegjësinë për rindezjen e konfliktit tek njëra anë, pra tek serbët. Pala tjetër, kosovarët, qeveria në Prishtinë, a do të thonit që është krejtësisht e pafajshme?

Schwarz-Schilling: Mund të thuash që disa gjëra mund të ishin bërë më mirë. Edhe atje ka mangësi me shtetin e së drejtës. Por unë nuk e di se cili vend do të kishte durim, që pasi i është dashur të bëjë një luftë, e cila u parandalua prej NATO-s në mënyrë që të mos përsëritej nga Serbia në të njëjtën mënyrë si në Bosnje, tani që ka kaluar kaq kohë gati dymbëdhjetë vjet, të mos mund të zbatohen rregullat e paqes, sepse bllokohen nga Serbia. Unë do të dëshiroja, që politika e jashtme, edhe në Gjermani, të flasë qartë. Plani i Ahtisaari-t, është realizuar me mandatin e OKB-së, është realizuar me mandatin e BE-së, gjithçka është pranuar dhe gjithçka është bllokuar vazhdimisht nga Serbia. Unë mendoj, se konform kësaj edhe gjuha ndaj Serbisë duhet të jetë e prerë dhe e qartë.

[Adriana]

Kongresmeni amerikan Eliot Engel i bën thirrje Beogradit që të njohë pavarësinë e Kosovës.

[Adriana]

[Arbëri]

KFOR-i kërkon trupa shtesë në Kosovë

Forca e NATO-s në Kosovë ka kërkuar dërgimin e trupave shtesë në vend, pas përshkallëzimit të dhunës javën e kaluar.
“Po kërkojmë trupa nga jashtë. Nuk mund të them numrat, por do të jetë një batalion”, tha zëdhënësi i KFOR-it, Diter Vihter, për agjencinë Reuters.
Situata në veri është përkeqësuar pas aksionit të forcave speciale të Policisë së Kosovës për të vënë nën kontroll pikat kufitare 1 dhe 31.
http://informohu24.net/kfor-i-kerkon-tr ... ne-kosove/

[erix77]

Po mire Saliu ti heqi ca cuna nga Afganistani dhe ti coje ne Kosove megjithese une do preferoja te leviznim ca trupa nga Greqia se atje kemi cuar ca si shume.

[Adriana]

Stefanoviq:'Mospajtimi i Kosovës me marrëveshje, i dëmshëm'

Shefi i ekipit të Serbisë në bisedimet me Kosovën, Borisllav Stefanoviq, deklaroi se nëse është e vërtetë se qeveria e Kosovës nuk pajtohet me marrëveshjen e arritur ndërmjet KFOR-it dhe zyrtarëve serbë, kjo “do të ishte shumë e dëmshme për stabilitetin e përgjithshëm”. Ai mbrëmë vonë, për mediat serbe, vlerësoi se marrëvshja e arritur ndërmjet komandantit të KFOR-it, Erhard Byler, dhe zyrtarëve serbë, Borisllav Stefanoviq e Goran Bogdanoviq, “në masë të madhe është i mirë për qetësimin e situatës dhe kthim në procesin e bisedimeve”.

[Adriana]

Zoti Surroi tha se Kosova dhe Serbia kanë një konflikt të papërfunduar, i cili duhet të përmbyllet me bisedime.

[Adriana]

Marrëveshje për heqje bllokadash në veri - Qeveria e Kosovës kundër.



Komandanti i KFOR-it, gjeneralmajori Erhard Bühler ka arritur një marrëveshje me zyrtarët e qeverisë serbe për zhbllokimin e rrugëve në veri të Kosovës. Qeveria kosovare e vlerëson draftmarrëveshjen si të papranueshme.



Tensionet në veri të Kosovës vazhduan nëntë ditë me radhë, përderisa mëngjesin e së mërkurës magjistralja Mitrovicë - Rashkë, pikërisht në fshatin Rudare të komunës së Zveçanit, u gdhi me një kryq shtatë metërsh. Kryqi i vu nga serbët lokal, sipas të cilëve atë do ta shenjtëronte peshkopi i Rashkës dhe i Prizrenit, Teodosije; një lajm ky të cilin e demantoi Kisha Ortodokse serbe në Kosovë. Përderisa, igumani i Manasitirt të Deçanit Sava Janjiq, tha për Deutsche Wellen se „Kryqi është vënë pa bekimin e kishës dhe peshkopi Teodosije nuk ka asnjë lidhje me vënjen e kryqit e aq më pak të shenjtërimit të tij“.





Draftmarreveshje e KFOR-it me perfaqësuesit serb

Largimi i protestuesve serb nga barrikada në Rudarë ishte parakusht për takimin e të mërkurës mbrëma në mes të komandantit të KFOR-it Erhard Bühler me shefin e ekipit negociator për bisedime me Kosovën, Borislav Stefanoviq, i cili ka kërkuar nga protestuesit që të mundësojnë kalimin e lirë të ushtarëve të KFOR-it.

„Gjatë ketij takimi të mbajtur në orët e vona të së mërkurës, gjeneralmajori Erhard Bühler dhe të dy zyrtarët e lartë serb, Stefanoviq dhe Bogdanoviq, kanë arritur një marrëveshje në të cilën parashihet që në pikat kufitare 1 në Jarinjë dhe 31 në Bernjak, sistemi i tanishëm i kontrollit të vazhdojë i pandryshuar deri në mes të shtatorit; që veturat, kamionët me peshë deri në 3.5 tonë dhe kamionët që transportojnë ndihma humanitare, përfshirë edhe ushqimin, të kalojnë pas identifikimit dhe kontrollit për armë, si dhe të bëhet largimi i bllokadave rrugore dhe rivendosja e lirisë së qarkullimit“, bëhet e ditur në komunikatën e KFOR-it, sipas së cilës për bisedimet, komandanti i KFOR-it ka pasur autoritetin e plotë e të gjitha institucioneve të përfshira. Nga ana tjetër Stefanoviqi dhe Bogdanoviqi do ta koordinojnë marrëveshjen me presidentin e Serbisë Boris Tadiq dhe autoritetet tjera të involvuara nga pala serbe.





Draftmarrëveshja e papranueshme për qeverinë e Kosovës

Pak kohë pas publikimit të draftmarrëveshjes së përmbledhur në tri pika, të arritur në mes të gjeneralit të KFOR-it, Erhard Bühler dhe zyrtarit serb, Borislav Stefanoviq qeveria e Kosovës e ka vlerësuar atë si të papranueshme.

”Qeveria e Republikës së Kosovës duke respektuar në plotëni Kushtetutën dhe ligjet e Kosovës, si shtet sovran, i pavarur e autonom në vendimmarrje, njofton opinionin publik vendor dhe ndërkombëtar se kjo draftmarrëveshje është e papranueshme për Qeverinë e Republikës së Kosovës dhe e parealizueshme në territorin e Republikës së Kosovës. Qeveria e Kosovës mirëpret përpjekjet e KFOR-it për zhbllokimin e rrugëve dhe krijimin e një ambienti të sigurt për të gjithë qytetarët e Kosovës. Por, për Kosovën nuk do të ketë kthim në gjendjen e para 25 korrikut dhe Qeveria e Kosovës do të respektojë në përpikmëri masat e reciprocitetit me Serbinë”, thuhet në komunikatën e qeverisë e cila vie si kundërpërgjegje ndaj marrëveshjes së KFOR-it me përfaqëuësit serb